भांगरभूंय | प्रतिनिधी
पणजीः पोरूंचे तुळेंत अंदूं गोंयांत डेंग्यूचे दुयेंती वाडल्यात. गोंयांत जानेवारी ते ऑक्टोबर 2023 मेरेन डेंग्यूचे 421 दुयेंती सांपडिल्ले. जाल्यार 2024 त ह्याच 10 म्हयन्यांच्या काळांत 512 दुयेंती सांपडल्यात. अशें आसलें तरीय पोरूंच्या ऑक्टोबराचे तुळेंत अंदूं उणें दुयेंती सांपडल्यात. ऑक्टोबर 2023 त 101 दुयेंती सांपडिल्ले, जाल्यार ऑक्टोबर 2024 त हो आंकडो उणो जावन 69 चेर पावला.
भलायकी खात्यांतल्या वरिश्ठ अधिकाऱ्यांनी दिल्ले म्हायती प्रमाण गोंयांत जून आनी जुलय ह्या काळांत घोग्यांनी पावस पडटा. अशें स्थितींत जळारांची पैदास तुळेंत उणी जाता. ऑगस्ट आनी सप्टेंबरांत पावसा वांगडा वत लेगीत पडटा. जळारांची पैदास जावपाक ही स्थिती पुरक थारता. ऑक्टोबर आनी नोव्हेंबरांत गोंयांत वत- पावसाचो खेळ नाशिल्ल्यान जळारांची पैदास उणी जाता. हे खातीर फुडल्या म्हयन्यांत डेंग्यूच्या दुयेंतींची संख्या आनीक उणी जावपाची शक्यताय आसा.
गोंयांत ऑक्टोबरांत सांपडिल्ल्या 69 दुयेंतींत उत्तर गोंयांत 53 जाल्यार दक्षीण गोंयांतल्या 16 दुयेंतींचो आस्पाव आसा. ऑक्टोबरांत सगळ्यांत चड 11 दुयेंती हे शिवोले सांपडिल्ले. ते उपरांत म्हापश्यां 10, कुडटरे 5, केप्यां, हळदोण्यां, कोलवाळे, साळगांवां आनी काणकोणां दरेकी 4, कासावले 3, पेडण्यां, दिवचले आनी बाळ्ळी दरेकी 2, जाल्यार कांदोळी, कासरवर्णे, सांखळे, पर्वरे, वास्को, कुठ्ठाळे आनी नावेली दरेकी एक दुयेंती सांपडिल्लो. भलायकी अधिकाऱ्यांनी सांगलें, पावसाळो सोंपिल्ल्यान गोंयांत परतून एकदां बांदकाम प्रकल्प सुरू जाल्यात. बांदकाम कामगार उक्ताडार उदक सांठोवन दवरतात. अश्या उदकांकूच डोंग्यूच्या जळारांची पैदास जाता. हे आदींय एप्रील आनी मे म्हयन्यांत अशें जाल्लें. ताका लागून भलायकी खात्या वतीन अश्या सुवातांचेर विशेश लक्ष दवरतात. पोरूं ऑक्टोबरांत जंय हॉटस्पॉट सांपडिल्ले थंय लेगीत वखदां मारपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
