भांगरभूंय | प्रतिनिधी
पणजी: उत्तर गोंय जिल्लो न्यायदंडाधिकार्यान पर्वरेच्या राष्ट्रीय म्हामार्ग ६६ चेर जड वाहनांच्या प्रवेशाचेर बंदी घाल्या. पुलाचें काम पुराय जाय मेरेन ही बंदी लागू आसतली.
बांदा वटेच्यान येवपी आनी पेडणें, बार्देस, तिसवाडी वटेन वचपी ट्रेलर, कंटेनर सारकिल्ल्या जड म्हाल येरादारी वाहनांनी सकाळीं ६ ते रातचीं १० वरां मेरेन पत्रादेवी, सक्राळ, तोर्से, तांबोसे, उगें आनी रेडकार हॉस्पिटला लागसार थारचें आनी रातचीं १० ते सकाळीं ६ वरां मजगतीं येरादारी करची. अशा वाहनांनी मेरशे जंक्शना कडल्यान बाणस्तारी/कुठ्ठाळे वटेन येरादारी करची.
अन्नधान्य, भाजयो, नाशवंत वस्तू सारकिल्ल्या गरजेच्या म्हालाची येरादारी करपी जड वाहनांनी रस्त्यार कमी येरादारी आसपी वेळार म्हळ्यार सकाळीं ११ ते दनपरां १२.३०, २.३० ते सांजेचीं ४ आनी रातच्या ८.३० उपरांत पर्वरे/ मेरशे वटेनच्यान पणजे वटेन येवचें.
पिळर्ण उद्देगीक वसणुकेंतल्यान यो-वच करपी जड वाहनांनी सकाळीं ६ ते रातचीं १० वरां मेरेन पर्वरेच्या रस्त्याचो वापर करचो न्हय. ह्या वाहनांनी साळगांव जंक्शना कडल्यान म्हापशें/ ग्रीनपार्क जंक्शना सावन फुडें येरादारी करची, अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
