भांगरभूंय | प्रतिनिधी
ग्रेटर नोएडा, खबरां संस्था: उत्तर प्रदेशांतल्या ग्रेटर नोएडांत एक धक्को दिवपी घडणूक घडली. हांगाच्या एका हॉस्पिटलांत सात वर्सां पिरायेच्या चल्याचेर शस्त्रक्रिया करिनासतना वट्ट ४५ हजार रुपयाचें बिल घेतिल्ल्याचो प्रकार मुखार आयला. ह्या भुरग्याचे दोळे दुसर्या एका दोतोरान तपासले उपरांत हे विशीं कळून आयलें. ह्या प्रकाराक लागून बरोच बोवाळ जाला. तशेंच ह्या कुटुंबान हॉस्पिटलाचेर केल्ल्या आरोपाची आतां चवकशी सुरू जाल्या. त्या भुरग्याच्या पालकांनी हॉस्पिटला आड पुलिशेंत कागाळ केली. मात आजूनय गुन्यांव दाखल जावंक ना.
भुरग्याच्या बापायचो आरोप
त्या भुरग्याच्या बापायन आरोप केल्ले प्रमाण, तांच्या पुताच्या दाव्या दोळ्या बदला उजव्या दोळ्याचेर शस्त्रक्रिया केली. तांचो पूत १२ नोव्हेंबराक ताच्या दाव्या दोळ्यांतल्यान सेगीत उदक आयिल्ल्यान तपासणे खातीर हॉस्पिटलांत गेल्लो. तपासणे उपरांत दोतोरांनी शस्त्रक्रिया करपाक सांगलें. उपरांत आपूण एका सप्तका पयलीं पुताक हॉस्पिटलांत घेवन गेलों. तेन्ना थंयच्या दोतोरांनी आपल्याक सांगलें, पुताक एलर्जी आसा म्हणून. उपरांत एका सप्तकांत शस्त्रक्रिया केली. हाचेर दोतोरांनी ४५ हजार रुपया खर्च आयला आनी शस्त्रक्रिया येसस्वी जाल्ल्याचें सांगलें. दोळ्यांतल्यान एक बारीक धातू सारकें कितें आशिल्लें तें काडून उडयलें अशेंय दोतोरांनी सांगलें. उपरांत आमी घरा गेलीं. मात, घरा वचून आमच्या लक्षांत आयलें पुताच्या ज्या दोळ्याची शस्त्रक्रिया करपाची आशिल्ली ती जावंकूच ना. उपरांत आमी रोखडेच दुसर्या दोतोराचो सल्लो घेतलो. तेन्ना त्या दोतोरान सांगलें, खंयच्याच दोळ्याचेर कसलीच शस्त्रक्रिया जावंक ना. तुमकां फटयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
