भांगरभूंय | प्रतिनिधी
पणजीः नवी दिल्लीच्या भारत मंडपात आयोजीत 43 व्या भारतीय आंतरराष्ट्रीय वेपार मेळाव्यांत “Viksit Bharat @2047” ह्या संकल्पने वयल्या गोंयच्या दालनाचे म्हायती आनी प्रसिध्दी खात्याचे संचालक दीपक बांदेकर हांचे हस्तुकीं काल उक्तावण जालें.
सहाय्यक म्हायती अधिकारी शांतो नायक, म्हायती सहाय्यक सिध्देश सामंत, गोंय गुंतवणूक प्रोत्साहन मंडळाचे प्रशासकी अधिकारी सदाशीव पंडीत आनी हेर विभागांचे अधिकारी ह्या वेळार हाजीर आशिल्ले.
ह्या वेळार बांदेकर हांचे हस्तुकीं “आत्मनिर्भर भारत, स्वयंपूर्ण गोंय” पुस्तीकेचेंय प्रकाशन जालें.
भारतीय वेपार प्रोत्साहन संघटणे वतीन आयोजीत करतात ताे हो एक व्हड भारतीय आंतरराष्ट्रीय वेपार मेळावो आसा आनी वेवसाय, उद्देग, संस्कृती आनी शिक्षणीक उपक्रमांच्या प्रोत्साहनाक व्यासपीठ उपलब्ध करून दिता. मेळाव्यांत उद्देग, वेपार आनी हेर वेवसायीक उत्पादनां आनी सेवांचे प्रदर्शन मांडटात.
भारत मंडपात गोंयचें दालन सुमार 203 चौ. मि. सुवातेंत उबारलां आनी दालन गोंयची वास्तुकला आनी प्रगतीचें दर्शन घडयता. गोंयच्या दालनांत गोंयचे पर्यटन, गुंतवणूक सुविधा, उद्देग आनी हेर विकास, गोंयची लोककला आनी संस्कृती, गोंयची खाणां-जेवणां, सरबराय, आनी हेर सुविधांचेर प्रदर्शन मांडलां.
म्हायती आनी प्रसिध्दी खात्या सयत, पर्यटन खातें, हस्तकला, कावी कला, टॅक्सटायल आनी कॉयर, गोंय पर्यटन विकास म्हामंडळ, उद्देगीक विकास म्हामंडळ आनी गुंतवणूक प्रोत्साहन मंडळ ह्या मेळाव्यांत वांटेकार जाल्यात. तशेंच गोंयच्या हस्तकारांगिरांनी आपल्या उत्पादनाचे विक्री-प्रदर्शन मांडलां. 27 नोव्हेंबर मेरेन हो वेपार मेळावो भरतलो.
गोंयच्या दालनाचें डिजायन आनी उभारणी मे. मिर्ची रिपब्लीक मिडिया प्रॉडक्शनाचे सन्मान केंकरे आनी आर्यन खेडेकार हांणी केल्या. गोंयच्या दालनांत दरेक दिसा गोंयच्या कलाकारां वतीन गोंयच्या परंपरीक कला आनी संस्कृतीच्या कार्यावळींचें सादरीकरण करतले.
गोंयच्या दालनाच्या उक्तावणा पयलीं केंद्रीय वाणिज्य आनी उद्देग मंत्री पियुष गोयल हांचे हस्तुकीं आंतरराष्ट्रीय वेपार मेळाव्याचें उक्तावण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
