भांगरभूंय | प्रतिनिधी
दशरथ परबः विवीध कार्यावळींचें आयोजन
पणजीः नोव्हेंबराच्या 18 ते 24 वेर मजगतीं इन्स्टिट्यूट मिनेझीस ब्रागांझा (आयएमबी) स्थापणूक दीस मनयतली. हे निमतान आयएमबी पुस्तक सप्ता मनयतली. ह्या दिसांनी कला आनी साहित्यां बरोबरच मनरिजवणेच्या कार्यावळीचो सुरबूस लाव कार्यावळींत वांटेकार जावपी लोकांक घेवपाक मेळटलो, अशे आयएमबीचे अध्यक्ष दशरथ परब हांणी सांगलें.
आयएमबीच्या स्थापणूक दिसा विशीं कार्यावळीची म्हायती दितना अध्यक्ष दशरथ परब पत्रकार परिशदेंत उलयताले. ह्या वेळार आयएमबीचे वांगडी सचीव अशोक परब हाजीर आशिल्ले.
वर्सान वर्स आयएमबी 18 नोव्हेंबर ते 24 नोव्हेंबर ह्या सप्तकांत विवीध कार्यावळींचें आयोजन करता. हे कार्यवळींक लागून साहित्य आनी कलेक घटाय मेळटा, अशें परब हांणी सांगलें.
आयएमबी स्थापन जावन 53 वर्सा पुराय जालीं. तशेंच वर्सान वर्स साहित्य आनी कलेक प्राधान्य दिवपाचें काम चालूच दवरलां. खऱ्या अर्थान ही संस्था पुर्तुगेज काळांत सुरू जाल्या आनी ही संस्था वास्को द गामा इन्स्टिट्यूट ह्या नांवान वळखताली. पुर्तुगेज गेले उपरांत गोंय मुक्त जातकूच हाचें नांव मिनेझीस ब्रागांझा दिलें. खूबशे गोंयचे तशेंच शेजारी राज्यांतले कलाकार आनी साहित्यीक येवन हे कार्यावळीचो आस्वाद घेतात आनी कलेक घटाय दितात होच आमचो हेतू आसा, अशें परब हांणी सांगलें.
18 वेर पयल्या दिसा उक्तावणा वेळार सेंट्रल लायब्ररीचे क्युरेटर सुशांत तांडेल कार्यावळीचे मुखेल सोयरे आसतले आनी सांजे 4 वरांचेर तांडेल हांचे हस्तुकी उक्तावण जातलें. उक्तावणा उपरांत बायलांनी बरयिल्ली आनी बायलांनी भुमिका केल्ली एकांकी कार्यावळ आसतली. शित कडी प्रॉडक्शन हाचे आयोजन करतली, अशे आयएमबीचे वांगडी सचीव अशोक परब हांणी सांगलें.
दुसरे दिसा रजनीगंधा संगीत कार्यवळ जातली. तातूंत कोंकणी पदा आनी मराठी भावगीतां सादर जातली. बुधवारा वाळपय सत्तरीचे विजय गांवकर हांचो पंगड दशावतारी नाटक सादर करतले. 21 वेर बिरेस्तारा तोमाझीन कार्दोज हांचो कला मोगी पंगड गोंयची कोंकणी कातारां म्हणटले, अशें परब हांणी सांगलें.
22 वेर शुक्रारा खाशेले सिधुंदुर्गचे कलाकार भावबंद कोंकणचे ही कार्यावळ आयोजन करून डॉ. सई ललीत मालवणी कविता वाचन आनी मालवणी नाटकांतले प्रवेश सादर करतले. शेनवारा सकाळीं 9.30 ते 5.30 वरां मजगतीं कोंकणी कवितेंतले वेंचीक वजर्कणी, याद. आस्वाद आनी अनुवाद हो परिसंवाद जातलो आनी डॉ. किरण बुडकुले हाचे आयोजन करतली अशें परब हांणी सांगलें.
24 वेर आयएमबी स्थापणूक दीस मनोवन स्थापणूक जाल्ले वर्स 1963 सावन ते आतां मेरेनचे आदले अध्यक्ष, उपाध्यक्ष, वांगडी सचीव जे हयात आसात तांचो भोवमान करतले. मुख्यमंत्री प्रमोद सावंत हांणी आपलो हे कार्यावळीक सहभाग दर्शयला तशेंच कला आनी संस्कृती मंत्री, कला आनी संस्कृती सचिव हजर आसतले. ह्या वेळार संस्थेचें सम्हयनाळें गोवापुरी हें मॅगेझीन उजवाडा हाडून ताचो लोकार्पण सुवाळो जातलो, अशी म्हायती परब हांणी दिली.
ह्या दिसा मंथन आनी कपयाळें हीं दोन पुस्तका उजवाडा हाडटले. माधवी सरदेसाय हांणी बरयिल्लें मंथन आनी सुधा खरंगटे हांणी बरयिल्लें कपयाळें ह्या कोंकणी पुस्तकांचो इंग्लीश अनुवाद केला. गोंयचे 10 संस्थाचे प्रकाशक, मुद्रण करपी आनी पुरवण करपी आपल्या पुस्तकांचे प्रदर्शन मांडटलें, अशें परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
