भांगरभूंय | प्रतिनिधी
नवी दिल्ली : भारताचे पयले प्रधानमंत्री जवाहरलाल नेहरू हांचे कडेन संबंदीत साहित्य वाचपाचें आसल्यार वा संशोधन करपाचें आसल्यार तें डिजीटल स्वरूपांत मोबायलांचेर मेळटलें. ते विशींचें काम सध्या चालू आसा. ‘द नेहरू आर्कायव्ह’ फुडल्या वर्सा १४ नोव्हेंबराक पंडीत नेहरूंचे जयंती दिसा प्रत्यक्षांत येतलें. ‘जवाहरलाल नेहरू मेमोरियल फंडा’न (जेएनएमएफ) बुधवारा हाची घोशणा केली.
ह्या उपक्रमांत ‘द सिलेक्टेड वर्क्स ऑफ जवाहरलाल नेहरू’चे १०० खंड, १९४७ ते १९६४ वर्सा मुख्यमंत्र्यांक तांणी बरयिल्लीं पत्रां, ‘लेटर्स फ्रॉम अ फादर टू हिज डॉटर’, ‘ग्लिम्प्सेस ऑफ वर्ल्ड हिस्ट्री’, ‘द युनिटी ऑफ इंडिया’, ‘द डिस्कव्हरी ऑफ इंडिया’, ‘ए बंच ऑफ ओल्ड लेटर्स’ अशीं पुस्तकां लोकांक वाचपाक मेळटलीं.
हें डिजिटल आर्कायव्ह अमेरिकेच्या विल्सन सेंटरचे धर्तरेचेर तयार केल्ल्यान नेहरूंची १९१७ ते १९६४ वर्साचीं भाशणां, तांच्या समकालीनांनी तांचेर केल्लें लेखन, संवसारीक अभिलेखांतलें तांचेवेलें साहित्य तशेंच प्रकाशीत जावंक नाशिल्ल्या लेखनाचोय हातूंत आसपाव आसतलो. हाचेर नेहरू विशीं म्हायती सहज उपलब्ध जातली. ती डावनलोड करपाक मेळटली, अशें ‘जेएनएमएफ’चे विश्वस्त जयराम रमेश हांणी म्हणलें.
जाल्यार नेहरूंच्या आधुनीक भारत आनी संवसारांतले निर्मितींतल्या योगदानाची म्हायती फुडले पिळगेक जावप गरजेचें. ताका लागून हें आर्कायव्ह मजत करतलें अशें संस्थेचे उपाध्यक्ष करण सिंग हांणी म्हणलें.
‘जेएनएमएफ’ची स्थापना १९६४ त ट्रस्टा वरवीं जाल्ली. तातूंत ‘द सिलेक्टेड वर्क ऑफ जवाहरलाल नेहरू’चें प्रकाशन तशेंच ‘जवाहरलाल नेहरू स्मृती व्याख्यान’ आयोजीत करता. दर वर्सा अभ्यासकांक जवाहरलाल नेहरू मेमोरियल फेलोशिप दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
