भांगरभूंय | प्रतिनिधी
पणजी ः सरकारी नोकरी दिवपाचें हांयस दाखोवन पयशे घेवपाच्या प्रकरणा संबंदी निवृत्त न्यायाधीशांच्या फुडारपणा खाला सोमार मेरेन चवकशी समिती (एसआयटी) स्थापन केलीना जाल्यार काँग्रेस पक्ष घरां-घरांनी वचून आंदोलन करतलो आनी भाजपाचे कारनामे उक्ते करतलो, अशी शिटकावणी प्रदेशाध्यक्ष अमित पाटकार हांणी दिली. बिरेस्तारा पणजे जाल्ले पत्रकार परिशदेंत ते उलयताले. ह्या वेळार विरोधी पक्ष फुडारी युरी आलेमांव, आदले केंद्रीय मंत्री रमाकांत खलप, आदले खासदार फ्रान्सीस सार्दिन आनी हेर हाजीर आशिल्ले.
सरकारी नोकरी दिवपाचें हांयस दाखोवन सामान्य लोकां कडल्यान पयशे वसूल करपाच्यो घडणुको दिसान दीस वाडत आसात. काँग्रेस पक्षान हाचें आदीं एसआयटीची स्थापन करपाची मागणी केल्ली. पूण भाजपा सरकार मुद्दाम हाचे कडेन आडनदर करता. तातूंतले कांय दुबावीत भाजपा पक्षा कडेन संबंदीत आसात. गोंयच्या तरणाट्या भुरग्यांच्या फुडारा कडेन भाजपा सरकार खेळटा. हातूंत उंचेल्या पांवड्यावेले लोक आसपाची शक्यताय आसा अशें पाटकार हांणी सांगलें.
राज्यांत बेरोजगारी वाडिल्ल्यान दरेक गोंयकार नोकरे खातीर तळमळटा. ताका लागून लोक नोकरी मेळपाचे आशेन पयशें दितात. पयशे घेवपी लोकांची मालमत्ता जप्त करून ते पयशे लोकांक परत दितले अशें मुख्यमंत्री डॉ. प्रमोद सावंत हांणी सांगलें. फटवणूक करपी लोकांची मालमत्ता जप्त करून पयशे परत करपाची तरतूद खंयच्या कायद्यांत आसा, हें तांणी एकदां स्पश्ट करचें. मुख्यमंत्र्यान लोकांक फट आस्वासनां दिवचीं न्हय, अशेंय तांणी म्हणलें.
वेगवेगळ्या केंद्रीय संस्थांच्या अहवाला प्रमाण बेरोजगारी मळार गोंय पयल्या क्रमांकाचेर आसा. केंद्रांतल्या भाजपा सरकारानच ही आंकडेवारी जाहीर केल्या. पूण राज्यांतलें भाजपा सरकार हें मान्य करपाक तयार ना. पयशे घेवन राज्यांत सरकारी नोकऱ्यो विकपाक मेळच्यो म्हणून रोजगारा कडेन दुर्लक्ष जाता असो दुबाव आसा. ह्या प्रकरणाची पुराय चवकशी करपा खातीर एसआयटी स्थापन करप गरजेचें आसा अशें युरी आलेमांव हांणी सांगलें.
एसआयटी वरवींच ह्या प्रकरणाची चवकशी करची. हातूंत आस्पाव आशिल्ल्या दुबावितांची नार्को चांचणी करपाक जाय जाल्यारूच सत्य भायर येतलें अशें मत रमाकांत खलप हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
