भांगरभूंय | प्रतिनिधी
केरी-सत्तरी ः आषाढी एकादशी निमतान विठ्ठलापूर-सांखळेचे सरकारी मुळावे शाळेच्या विद्यार्थ्यांनी आनी पालकांनी विठ्ठल मंदिरा मेरेन दिंडी काडली.
सकाळीं विद्यालयांतले विद्यार्थी संतांचो आनी वारकऱ्यांचो भेस करून विद्यालयांत आयले आनी ‘विठ्ठल, विठ्ठल जय हरी’ असो विठ्ठलाचो गजर आनी जयघोश करीत विद्यालय ते विठ्ठल मंदिरा मेरेन चलून गेले. हे दिंडेक विद्यार्थ्यां वांगडा पालक शिक्षक संघाचे अध्यक्ष वर्धमान शेंदुरे, पालक शिक्षक संघाचे हेर पदाधिकारी आनी पालकूय आसले.
ह्या सगल्यांनी पालखी नाचयत, विठ्ठलाचो गजर करीत, नाचत गायत विठ्ठल मंदिराक दिंडी प्रदक्षिणा काडली. यत्ता चवथीच्या विद्यार्थ्यांनी रिंगण सादर करून मंदिराचो वाठार भक्तीमय केलो.
सगल्या विद्यार्थ्यांनी ह्या वेळार श्री विठ्ठलाचें दर्शन घेतलें आनी तीर्थप्रसादाचो लाव घेतलो. ह्या विद्यार्थ्यांक पालक शिक्षक संघाचे अध्यक्ष, हेर पदाधिकारी, पालक आनी शिक्षकांचें योग्य मार्गदर्शन लाबलें. पालक शिक्षक संघाचे अध्यक्ष वर्धमान धन्यकुमार शेंदुरे, शाळा वेवस्थापन समितीची अध्यक्ष प्रिया प्रभंजन किंजवडेकर, मुख्याध्यापिका कल्पना मळीक, पालक शिक्षक संघाचे हेर पदाधिकारी, शिक्षक आनी पालक ह्या वेळार व्हडा संख्येन हाजीर आसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
