भांगरभूंय | प्रतिनिधी
लंडन, खबरां संस्था ः ब्रिटीश लेखिका समांथा हार्वे हिका ‘ऑर्बिटल’ हे कादंबरी खातीर २०२४ वर्साचो बुकर पुरस्कार फावो जाला. ‘ऑर्बिटल’ ही अंतरिक्षाचेर आदारिल्ली पयली बुकर पुरस्कार जिखपी कादंबरी.
हे कादंबरीच्या कथानकाचो वट्ट काळ २४ वरां आनी ताच्या पानांचो आंकडो फकत १३६ आसा. आंतरराष्ट्रीय अंतराळ केंद्राचेर स अंतराळवीर आनी तांणी केल्ल्या एका दिसाच्या प्रवासाचेर आदारिल्ली ही कादंबरी अंदूं ब्रिटनांत सगळ्यांत चड खपपी पुस्तक. हे अंतराळवीर धर्तरेचेर 16 सूर्योदय आनी सूर्यास्ताचे निरीक्षण करतात. ह्या काळांत ते वेगवेगळ्या खंडांचेर मार्गक्रमण करतात आनी वेगवेगळे हंगाम अणभवतात.
मंगळारा सांजवेळा लंडनांतल्या ओल्ड बिलिंग्सगेट हांगा जाल्ल्या सुवाळ्यांत लेखिका हार्वे हांचें नांव जाहीर जालें. ह्या वेळार ‘ऑर्बिटल’ ही ल्हान पूण तरी लेगीत प्रशस्त आनी सोबीत अशीं कादंबरी अशें वर्णन केलें. लेखिकेन दर एका मनशाच्या जिविताच्या वैयक्तीक आनी सामुहीक मुल्यांचो विचार केला अशें परीक्षकांनी सांगलें. धर्तरे आड न्हय तर धर्तरे खातीर उलोवपी दरेकाक हो पुरस्कार समर्पित करता अशें हार्वे हांणी सांगलें. बुकर पुरस्कार जिखपी ‘ऑर्बिटल’ हें दुसरें ल्हान पुस्तक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
