भांगरभूंय | प्रतिनिधी
प्रवीण आर्लेंकारः वेळ आयल्यार रस्त्यार देंवपाची शिटकावणी
भांगरभूंय | प्रतिनिधी
पेडणें: पेडणेंकारांनी आमकां वेंचून काडल्यात. ताका लागून जनतेक जाय तशेंच हे फुडें जातलें. पेडणें मतदारसंघांतल्या धारगळे जावपी सनबर्न फेस्टीवल खंयचेच परिस्थितींत जावपाक दिवचों ना. वेळ आयल्यार लोकां सयत रस्त्यार देंवून हो फेस्टीवल भायर मारतलों, अशी शिटकावणी पेडणेंचे आमदार तशेंच हस्तकला महामंडळाचे चेअरमन प्रवीण आर्लेकार हांणी मालपेंच्या कार्यालयांत आयोजीत पत्रकार परिशदेंत दिली.
ह्या वेळार माचयेर मोपा सरपंच सुबोध महाले, धारगळचे आदले सरपंच भूषण उर्फ प्रदीप नायक, धारगळचे आदले सरपंच तथा पंच वांगडी अनिकेत साळगांवकार, आदले जिल्लो पंचायत वांगडी तुकाराम हरमलकार, शिक्षक देवानंद गावडे, उद्देजक न्हानू हरमलकार आनी हेर हजर आशिल्ले.
आमदार प्रवीण आर्लेकार हांणी सांगलें, जेन्ना आपल्याक सनबर्न फेस्टिवल धारगळ पंचायत वाठारांत जावपाची खबर मेळ्ळी, तेन्ना आपली तकली सणसणपाक लागली. सकाळ सावन खूबश्या जाणांनी फोन करून, घरा हजर रावन आपल्याक विचारलें. आपणें केन्नाच अशे तरेचे फेस्टीवल धारगळे पंचायत वाठारांत वा पेडणें मतदारसंघांत जावचे खातीर मागणी करूंक ना. आपल्याक पर्यटन मंत्री वा मुख्यमंत्र्यांनी हे विशीं पूर्वकल्पना दिवंक ना. आपूण लोकां वांगडा आसतलों. कारण आपल्याक लोकांनी आमदार म्हणून वेंचून काडला. लोकांक जें जाय तेंच आपूण दिवपाचो यत्न करतलों. वेळा प्रसंगार लोकां सयत रस्त्यार देंवून धारगळे जावपी सनबर्न फेस्टिवल भायर मारतलों, अशी शिटकावणी आमदार आर्लेकार हांणी दिली.
आमदार आर्लेकार हांणी मुखार सांगलें, दर्यादेगेर जाल्लो फेस्टीवल एके वटेन सारको आशिल्लो. कळंगूटे, उपरांत हणजूणें, वागातोर आनी थेट आतां धारगळे म्हणल्यार पेडणें मतदारसंघांत आयोजीत करपाक सरकाराचो कितें हेतू आसा असो प्रस्न करून, जर अशे सनबर्न सारके फेस्टीवल हांगा आयोजीत केल्यार आपूण ओगी रावचों ना. जर ह्या फेस्टिवल वरवीं सरकाराक महसूल मेळटा जाल्यार तो फेस्टीवल दर्यादेग वाठारांत जावचो. मांद्रें मतदारसंघांत दर्यादेगेर हो फेस्टीवल जावपाक शकता. मात आपूण तो आमच्या मतदारसंघांत खंयचेच परिस्थितींत जावपाक दिवचो ना, अशी खर शिटकावणी तांणी दिली.
पेडणेंची संस्कृती वेगळी. ती राखून दवरप हें लोकप्रतिनिधींचें कर्तव्य आनी तें आपूण करतलों अशेंच आमदार आर्लेकार हांणी सांगलें. ह्या वेळार हे पत्रकार परिशदेक हजर आशिल्ल्या सरपंच, पंच आनी हेरांनी धारगळे जावपी सनबर्न फेस्टीवलाक विरोध केलो आनी रस्त्यार देंवपाची शिटकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
