भांगरभूंय | प्रतिनिधी
म्हापशें, प्रतिनिधी ः गुन्यांव फांट्यान एस्कॉट वेबसायट तयार करून ऑनलायन वेश्या वेवसाय चलोवपी रॅकेट उक्ताडार हाडलें. दुबावीत सय्यद सुल्तान उस्मान (54, रा. चित्तोर- आंध्रप्रदेश) आनी मोहम्मद सलामतुल्लाह मोहेबुल्ला (30, रा. गुरगांव हरियाणा) हांकां आंध्र प्रदेशांतल्यान अटक केल्या.
आतां मेरेन गोंय पुलिसांच्या गुन्यांव आनी सायबर गुन्यांव फांट्यान वेश्या वेवसायाक चालना दिवपी 78 संकेतथळां ब्लॉक केल्यात. गुन्यांव फांटो ह्यो वेबसायटी चलोवपी दुबावितांची वळप पटोवपा खातीर तपास करतात.
25 ऑक्टोबराक पुलिसांनी म्हायती आनी तंत्रज्ञान कायद्याच्या कलम 67, 67 अ, अश्लिलता प्रतिनिधित्व बायल कायद्याच्या कलम 6 आनी वेश्या वेवसाय प्रतिबंधक कायद्याच्या कलम 4 आनी 5 खाला दुबावितां आड गुन्यांव नोंद केल्लो. ह्या गुन्यांवाची चवकशी करतना गुन्यांव फांट्याक आंध्र प्रदेशांतल्या मदानपाल्लेच्यान ही वेबसायट चलता, अशी म्हायती मेळ्ळी. ते प्रमाण पुलिसांनी थंय वचून मदानपाल्ले पुलिसांच्या मजतीन दुबावीत सयेद आनी मोहम्मद हांकां अटक केली.
दुबावितांनी सेफवोल्क गोवा डॉट कॉम नांवाची एस्कॉर्ट वेबसायट तयार केल्ली. ताचेर एके बायलेचो अश्लील फोटो वापरून गिरायकांक एका खाशेल्या नंबराचेर संपर्क करपाक आवाहन करताले. गिरायकान पुश्टी केले उपरांत ते हो संदेश आपल्या एजंट दलालांक धाडटात. दलालां कडेन वेव्हार जाले उपरांत दुबावीत गिरायकांक रोख पयशे दिवन, गूगल पे वा पेटीएम सारकिल्या मोबायल अॅपा वरवीं आपलें कमिशन एकठांय करताले.
दुबावीत एस्कॉर्ट संकेतथळ वापरून बेंगळुरू, चेन्नय आनी देशांतल्या हेर मुखेल शारांनी ही एस्कॉर्ट सेवा चलयताले. पुलीस ह्या टोळयेंत संबंदीत आशिल्ल्या हेरांचो सोद घेतात.
पुलीस अधीक्षक राहुल गुप्ता, उपअधीक्षक राजेश कुमार हांच्या फुडारपणा खाला निरिक्षक विकास देयकार, हवलदार उदेश केरकार, हवालदार सुलेश नायक आनी प्रकाश उत्कुरी हांणी ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
