भांगरभूंय | प्रतिनिधी
सध्या बाजारांत नव्यो नव्यो गाडयो येत आसात. गाडयो तयार करपी दरेक कंपनीं स्पर्धेंत रावपा खातीर आपले आदले वॅरियंट मुदार करून लोकां मुखार हाडटा आनी मार्केटाचेर ताबो मेळोवपाचो यत्न करता.
पेत्रोला बरोबर सीएनजी आनी लायटीचेर चलपी इलॅक्ट्रीक विहिकल (इव्ही) गाडयो लोक पसंद करपाक लागल्यात. हवेंतलें प्रदुशण पयस करपाच्या हेतान सरकारान इव्ही गाडयांक उर्बा दिवपाक सुरवात केल्या. केंद्र सरकारा बरोबरूच राज्य सरकारांय इव्ही गाडी घेतिल्ल्यांक अनुदान दिता. पूण ताची एक अमूक टक्केवारी आसा. तातूंत भितर सरकार मजत करता.
इव्ही गाडी (चारचाकी) चलयतना तिचो खर्च किलोमिटरा फाटल्यान एक रुपया ते देड रुपया, जाल्यार पेत्रोलाचो 6 ते 7 रुपया असो आसता. इव्ही विशींचो खर्च आयकतना जिवाक मात्शें बरें दिसता. कित्याक तर मडगांवच्यान पणजे वचपाक 30 ते 45 रुपयांच्या खर्चान पावपाक शकता. म्हणल्यार दुचाकीच्या खर्चा परसय सवाय. हे खातीर मध्यमवर्गीय लोक लेगीत इव्ही गाडयो घेतना दिसतात.
आतांच्या तरणाट्यांक नोकरी लागली म्हणटकच पयलीं गाडी घेवपाचें सपन पडटा. आदल्या काळार दुचाकी घेताले. आतां आवय-बापूय भुरग्यांक कॉलेजींत शिकतनाच दुचाकी घेवन दिता, देखून तांचें सपन गाडी घेवपाचें आसता. कसल्याय बऱ्या वायट खिणाक गाडी ही जायूच पडटा. आणिबाणीच्या वेळार तर खंय सोदूंक वतलो भाड्याची गाडी म्हूण लोक जिणेंतली काटकसर करून तरी गाडी घेतातूच. हरशीं म्हयन्याक 25 ते 35 हजार जोडपी व्यक्तीक गाडी परवाडपा सारकी न्हयच. ताचे फाटल्यान अर्थीक कारण आसा. देखीक गाडी विकती घेतना सात वर्सां खातीर 6 लाख रुपयांचें रीण घेतल्यार, 9 टक्के कळंतरान (व्याज) म्हयन्याचो हप्तो 9653 रुपया जाता. गाडयेचो वर्सुकी विमो 35 ते 40 हजार रुपया आसता. बरें गाडी घेतली म्हूण ती चलोवपाक पेत्रोल लागता. वर्साक गाडी 10 हजार किलोमिटर चलयली जाल्यार ताचेर सुमार 60 ते 70 हजार रुपया खर्च. मॅन्टेनन्सा खातीर वर्साक 10 हजार रुपया. मागीर टायर झरतात, ताचेर खर्च असो कांयच न्हय म्हणल्यार वर्साक 2 ते 2.50 लाख रुपया गाडयेचेर खर्च जाता. अचूक गणीत करीत जाल्यार म्हयन्याक 25 हजार गाडये खातीर जाय. सात वर्सां उपरांत रीण पावतलें तेन्ना हो ताण मात्सो हलको जातलो. मात विमो, मॅन्टेनन्स, पेत्रोल हांचें गणीत चालूच उरतलें. मदीं गाडयेचे म्हत्वाचे सुटे भाग मोडले जाल्यार ताचेरय खर्च आसता. हे खातीर आतांच्या काळांत कमी येणावळ आशिल्ल्यांक गाडी परवाडपा सारकी वस्त न्हय.
आतां पेत्रोल दिसान दीस म्हारग जायत आसा हे खातीर लोक इव्ही गाडयो घेतात. प्रदुशण पयस करपाचे बाबतींत हें पावल येवकारपाचेंच. पूण परत प्रस्न येता, इव्ही कार मध्यमवर्गियांक परवडटा? म्हज्या कोंतान ना!!! इव्ही गाडयो निर्मिती करपी खंयच्याय कंपनींच्या दरांचेर नदर मारीत जाल्यार ती पेत्रोला परस 60 ते 70 टक्के म्हारग आसता. बरें टाटा सारकी कंपनी आपले बॅटरीचेर आनी मोटराचेर 8 वर्सांची गॅरंटी दिता. म्हणल्यार ह्या काळांत बॅटरी आनी मोटर कितेंय जालो जाल्यार ताची जबाबदारी कंपनी घेता. आनीक 8 वर्सा उपरांत बॅटरीक वा मोटराक पिडा मारीत जाल्यार? बॅटरी बदलची पडली आनी मोटर नवो बसोवचो पडलो जाल्यार? हय हे खातीर ही गाडी मध्यमवर्गियांक परवडना.
इव्ही गाडयां विशीं कांय अहवाल आयल्यात, तातूंत ही गाडी विकत घेतकच फक्त एका वर्सा भितर ताचें 50 टक्के डॅप्रिसिएशन जाता अशें म्हणलां. हाचो अर्थ इकरा लाख रुपया दिवन घेतिल्ले गाडयेची मोलावणी पांच लाख रुपयांचेर येवन थारता. पेत्रोल गाडयांचें अशें जायना. तांकां विकतना बरो दर मेळटा.
पेत्रोलाची गाडी आनी इव्ही गाडयेचो किलोमिटरा प्रमाणें खर्च मुद्दाम जाणा जावन घेवया. टाटाच्या पंच गाडये वरवीं हें गणीत जाणा जावन घेवया. पंचाचे पेत्रोल वॅरियंटाचो प्रेस 6 लाख रुपया आसा (विमो आनी आरटीओ सोडून) जाल्यार इव्हीचो प्रेस जो आदीं 11 लाख आशिल्लो, तो आतां 10 लाख रुपयांचेर हाडला. म्हणल्यार इव्ही गाडये खातीर चार लाख रुपया मायज मोडचे पडटात (हेर कंपनींचो प्रेस मायज आसा). आतां ह्यो दोनूय गाडयो एक लाख किलोमिटर चल्ल्यो जाल्यार पेत्रोलाचेर 6 लाख रुपया आनी विजेचेर 1.50 लाख रुपया खर्च येतलो. आतां तांच्या मुळाव्या प्रेसा वांगडा हो खर्च जोडलो जाल्यार पेत्रोल गाडी 12 लाख आनी इव्ही 11.50 लाखांचेर पावता. म्हणल्यार इव्हीचेर फक्त पन्नास हजार रुपया फायदो. कोणेंय जर ही गाडी 8 वर्सां भितर देड लाख चलयली जाल्यार तो घाल्ले पयशे भरून काडपाक शकता. कित्याक तर आठ वर्सां उपरांत तिची गॅरंटी सोंपतकच ती कोणाक नाका. बरें, पंचाचे मुळावे वॅरियंट पुराय चार्ज केले उपरांत 315 किलोमिटर धांवता आनी वयले वॅरियंट जाचो प्रेस 14.29 लाख रुपया मेरेन आसा ती 421 किलोमिटर धांवता अशें कंपनी म्हणटा. पूण ही गाडी जांणी घेतल्या तांचें आयकल्यार मुळावे वॅरियंट चडांत चड 260 आनी वयले वॅरियंट 360 वा 370 किलोमिटर मेरेन धांवपाक शकतात. हाचो अर्थ गाडी चलयतना एक दुगदूग उरतली ती म्हणल्यार बॅटरी सोंपपाची. पेत्रोलाचे बाबतींत अशें जायना. इंधनाचे पंप सगल्याक आसात. पूण अजून इव्ही गाडयां खातीर चार्जींग स्टेशनां जाय तितलीं तयार जावंक ना. तीं जालींय जाल्यार जादवाची बडी हाडल्यार लेगीत ती दोन मिणटां भितर चार्ज जावंक शकना. उण्यांत उणीं 45 मिणटां तरी चार्जींग स्टेशनार गाडी घेवन आमकां उबे रावचे पडटले.
हें सगलें करतना आनीक एक गजाल मतींत घेवपाची आसता ती म्हणल्यार जेन्ना इव्ही गाडये खातीर 4 ते 5 लाख रुपया रीण मायज जाता, ताचेर व्याज कितलें फारीक करचें पडटलें ताचोय हिशोब दवरचो.
दुसरें म्हुणल्यार पेत्रॉल आनी सीएनजीचो हिशोब केल्यार गणित एकूच जाता. फकत जाची गाडी दिसाक 100 किलोमिटरां वयर चलता ताका सीएनजी फायदेशीर. तो पयशे भरून काडपाक शकता. पूण फकत शेनवाराक आनी आयताराक गाडी भायर काडपी मध्यमवर्गीयांक सीएनजी खातीर 1 लाख रुपया मायज दिवन गाडी घेवप हो सौदो म्हारग पडटा. जाची गाडी चड चलता, ताच्या बॉल्साक फायदो जातलो. पूण मध्यमवर्गियांच्या न्हय… सरकाराक प्रदुशणाचें पडून गेलां जाल्यार इव्ही गाडयांचो प्रेस 60 ते 70 टक्क्यांनी देंवोवचो पडटलो. म्हारगायेच्या प्रदुशणांत तें जायत अशी मात आशा ना!!!
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
