भांगरभूंय | प्रतिनिधी
पणजीः नितळसाणे विशीं सांता क्रुझ मतदारसंघाचो दर्जो बाबत आसा. हे खातीर थळाव्यांनी तशेंच पंचायतीन आमदार आनी सरकाराक तेंको दिवंक जाय. फक्त आमदाराच्या नांवान घोशणा दिवन चलचें ना, अशी सुचोवणी मुख्यमंत्री डॉ. प्रमोद सावंत हांणी केली.
चिंबलाच्या उड्डाण पुलाच्या उक्तावणा वेळार उलयतना मुख्यमंत्र्यांनी ही खंत उक्तायली. ह्या वेळार थळावे आमदार रुडोल्फ फर्नांडीस आनी चिंबल पंचायतीचे सरपंच संदेश शिरोडकार हाजीर आसले.
हेर पंचायतींचे तुळेन सगल्यांत चड कोयर उडाेवपी तुमची पंचायत जावन आसा. सगल्यांनी जर आप आपलो कोयर विलो लावपा खातीर वर्गीकरण आनी हेर गजाली केल्यो जाल्यार तें शक्य जातलें. ह्या मतदारसंघांत आमदार, सरपंच, पंच हांचे बरोबर थळाव्यांची वेगळी बसका घेवन हो विशय तडीक लावुया अशें मुख्यमंत्र्यांनी म्हणलें.
लोकांनी थारवपाक जाय. कोयर रस्त्यार उडोवपाचो सोडून पंचायतीन अधोरेखीत केल्ल्या सुवातांचेर वा डस्टबिनांत उडोवचो. जाल्यार ह्या कोयराचे घाणीक लागून थळव्यांकच दुयेंस जावपाची शक्यताय आसा. उदरगतीची जापसालदारकी सरकार घेता. पूण नितळ दवरपाची जापसालदारकी लोकांनी घेवची असो सल्लो मुख्यमंत्र्यांनी दिलाे.
‘बाबा तुम आगो बढो’ हे सारिकिल्लो आमदाराच्या समर्थनांत घोशणा दिवप बरें आसा. पूण ‘कचरा साफ करो’ तें काम आमी सगल्यांनी मेळून करपाक जाय. आमी जर अशें करत जाल्यार बाबांक ‘आगे बढो’ म्हणपाची गरज ना. 100 टक्के लोक आमदारां बरोबरच रावतले, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
