भांगरभूंय | प्रतिनिधी
पणजी : कला अकादमी नुतनीकरणच्या कामांत जे बदल वा दुरुस्त्यो गरजेच्यो आसात, तांचे विशीं कृती दळाचे सल्लागार कंत्राटदारांक सुचोवण्यो करतले. मंगळारा जाल्ले बसकेंत कृती दळाच्या वांगड्यां सयत सल्लागारांची बसका जाली.
कला अकादमीच्या नुतनीकरणाचो अभ्यास करून अहवाल सादर करपा खातीर सरकारान कृती दळाची स्थापना केल्या. कृती दळाची दुसरी बसका मंगळारा जाली. कृती दळाचे अध्यक्ष विजय केंकरे हांच्या फुडारपणा खाला मनरिजवण संस्थेचे कचेरेंत बसका जाली, अशी म्हायती कृती दळाच्या वांगड्यांनी दिली. कृती दळान कला अकादमीची पळोवणी केले उपरांत एकदां बसका घेतल्या.
कला अकादमीची पळोवणी केले उपरांत जे उणाव वांगड्यांक दिश्टी पडले, ताची म्हायती सल्लागारांक दिल्या. सल्लागार अभ्यास करून दुरुस्ती विशीं सुचोवण्यो करतले. खंय, खंय आनी कशे तरेन दुरुस्ती करप शक्य आसा, हे विशीं सल्लागार कंत्राटदारांक मार्गदर्शन करतले अशी म्हायती कृती दळाचे वांगडी सचीव संतोष म्हापणे हांणी दिली.
कला अकादमीची दुरुस्ती तशेंच नुतनीकरणाचेर सराकारान 60 कोटीं परस चड पयशे खर्च केल्यात. दुरुस्ती तशेंच नुतनीकरणाच्या कामाचेर कलाकार तशेंच चार्ल्स कुरैय्या फावंडेशन समाधानी ना. दुरुस्ती तशेंच नुतनीकरणाच्या कामाची सरकारान चवकशी करची, अशी मागणी कला राखोण मांड तशेंच हेर संस्थांनी केली. मुख्यमंत्री डॉ. प्रमोद सावंत हांची भेट घेवन तांणी ही मागणी केली. हाचे उपरांत कला अकादमीची पळोवणी करून अहवाल सादर करपा खातीर मुख्यमंत्र्यांनी कलाकारांच्या कृती दळाची स्थापणूक केली. विजय केंकरे हे कृती दळाचे अध्यक्ष आसात. सरकार आनी कृती दळा मदले समन्वय अधिकारी म्हूण प्रसाद लोलयेंकार हांची नेमणूक जाल्या. समिती पळोवणी तशेंच अभ्यास करून सरकाराक अहवाल सादर करतली.
बसकेक कृती दळाच्या वांगड्यां सयत लायट्स, सावंड ह्या वाठारांतल्या तज्ञांची उपस्थिती आशिल्ली. दीनानाथ मंगेशकार सभाघराची स्टेज तशेंच कदेलां विशीं कृती दळाच्या वांगड्यांनी असमाधान उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
