भांगरभूंय | प्रतिनिधी
सगलेच कसलें ना कसलें तरी काम वळखीन, वशिल्यान, लांच दिवन करतात. थोडे कायदो माड्डुन मनाक येता तें करतात. म्हाका म्हजो लोकप्रतिनिधी वाटायतलो, हाची 200 टक्के खात्री तांकां आसता. चडशे खेपे तांचो अदमास खरोय थारता. थोड्यांक बदनामी, बंदखणीची भिरांत दिसना. बांदकामाच्या मळाचेरुय हें पळोवपाक मेळटा. एक दीस तीं बांदकामां कायदेशीर जातलीं, हे आशेन दर्यादेगांचेर, न्हंयां कुशीक, बफर झोनांत, अभयारण्यांत घरां बांदपाच्यो जायत्यो घडणुको घडल्यात. सरकारान उपरांत कांय बांदकामां कायदेशीरूय केल्यांत. पूण अशें सदांच जायत रावल्यार बेकायदेशीर बांदकामांक ओतो येतलो. थोडे प्रामाणीक, भावार्थी लोकूय कित्याक अशीं अनधिकृत बांदकामां करतात, ताचोय अभ्यास जावप गरजेचो. सरकारी कार्यालयांनी खेपो मारून वाज येता म्हणून काय?
गोंय अनधिकृत बांदकाम कायद्या खाला बांदकामां नियमित करपाक 10,184 अर्ज (उत्तर गोंय 5079, दक्षीण गोंय 5105) आयल्यात खंय. भितरले 3092 भायर मारल्यात. द. गोंयांतले चड. 5583 अर्ज प्रलंबीत आसात. तर फक्त 1509 अर्ज मंजूर केल्यात. उत्तर गोंयांतले 777 आनी दक्षीण गोंयांतले 732. अर्जूच करूंक नाशिल्लीं वा गुपचूप कायदेशीर करून घेतिल्लींय कितलीशींच प्रकरणां आसुंये. सनद, बांदकाम परवानो, स्वराज्य संस्थाचो ना हरकत दाखलो घेनासतना 28 फेब्रुवारी 2014 पयलीं बांदिल्लें बांदकाम नियमीत करपाक सरकारान गोंय अनधिकृत बांदकाम नियमन कायदो मंजूर केल्लो. 2016 वर्सा. अर्ज सादर करपाक 210 दिसांची मुजत दिल्ली. मागीर ती वाडयली. 2023 त तातूंत सुधारणा केली.
बेकायदेशीर बांदकामां तशीं गोंयांत नवीं न्हय. मांद्र्यां दक्षीणेंतल्या एका सुपरस्टाराच्या बांदकामाक पंचायतीन नोटीस काडिल्ली. पर्रा शेतांनी माती घालप, जमनींचीं रुपांतरां दोन वर्सां पयलीं मे म्हयन्यांत गाजिल्लीं. मेरशे खाजन शेतांत डांबर, माती, कोयर उडोवपाचें प्रकरण एका राजकी पक्षान उक्तडार हाडिल्लें. माकाझानांत पारंपरीक तळी पुरपाचो यत्न पंचायतीनूच बंद केल्लो. पेडण्यां म्हालांत पंचायतीक कांयच खबर नासतना बांदकामां जाल्ल्याचें दिसून आयिल्लें. एक हाॅटेल मोडून उडोवचो आदेश आयिल्लो. हळदोणें वाठारांत शेतजमनीचें रुपांतर करून बंगलो बांदिल्ल्यान बोवाळ जाल्लो……… ह्या प्रकरणांचें मुखार कितें जालें? दर खेपे व्हडलो बोवाळ जाता. मागीर सगलें शांत. शांततायेचो काळ उलगतकच कितें जाता, ताची खबर खंयचीच यंत्रणा दिना. फाटपुरवण करून पसून!
कोणाक सामकीच गरज आसा, ताणें ल्हानशें बांदकाम उबें केलें म्हूण कोण कांय म्हणचो ना. अर्थांत ताचे दुस्मान सोडून. बेकायदेशीर काम व्हड आसूं वा ल्हान, तो गुन्यांवूच हें मान्य. तरीय एकवेळ हातूंतल्यान मार्ग काडून ताका थाकाय दिवं येता. पूण दोंगराचे दोंगर कापून इमारतीचो दोंगर उबारप्यांचें कितें? हातूंतलीं कांय कामां तर कायदेशीर आसतात खंय. म्हणल्यार दोंगर कापप बेकायदेशीर, पूण ताचेर उबें जावपी बांदकाम कायदेशीर. कारण ताका सगले परवाने, दाखले घेतिल्ले आसतात. कोणाच्या तरी चुकीच्या पावलांक लागून गोंयचो सैम काबार जावपाक पावलां. गोंय तें केदें आनी हांगाचो सैम तो कितलो? आडनदर केल्यार गोंयचो कॅरमबोर्ड जावपाक वेळ लागचो ना. सैमाचो नाश करून चलिल्ली ही उदरगत एक दीस गोंयकारांकूच बादपाक शकता. केरळ, उत्तराखंड हीं दोन उदाहरणां पुरो. सैम, लोकवस्तेक बादा येवची ना, असो जागो आतां गोंयांत उरूंक ना. ताकाच लागून घडये खाजन जमनी, शेतां, दलदल, न्हंयो, दोंगर, रानां हांचे वाटेक मनीस गेला आसतलो. कायद्यान परवानगी ना, अशे जागे पसून बांदकाम करप्यांनी सोडूंक नात.
सैमसोबीत गांव उरल्यात काय नात, तें शारांनी पोटा खातीर स्थलांतरीत जाल्ल्या लोकांक बेस बरें खबर आसतलें. चाळीस वर्सां आदलो सैम याद करात, ताची आतांच्या गोंयां कडेन तुळा करात…. आनी मागीर गोंयचो हो सत्यनाश करपांत आपुणूय वांटेकार ना मूं असो प्रस्न स्वताकूच विचारात. जाप मेळटली. कांय वर्सां पयलीं शार आनी नगर नियोजन कायद्या खाला अधिसुचोवणी आयिल्ली. दोंगर कापपाक मेळचे नात, खोल जागो वा शेतांत मातयेचो भराव घालपाक मेळचो ना. हें करपाचेंच जालें जाल्यार मुख्य नगर नियोजकाची परवानगी घेवचीच पडटली, नाजाल्यार ख्यास्त. कितें जालें ताचें? लोकांनी स्वताच्यो सोडात, दुसऱ्यांचोय जमनी, दोंगर बांदकामा खातीर विकले. हें करपी करबट सांपडलें. विस्वण, चणाक सुटलें. आतां सगले वाट पळयतात, 2014 उपरांतचीं बांदकामां कायदेशीर करपाचें विधेयक केन्ना येता तें!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
