भांगरभूंय | प्रतिनिधी
पणजीः पोरणें गोंय पुलीस स्टेशनाचे हद्दींत एके 14 वर्सां पिरायेचे चलयेचो विनयभंग केलो. ह्या प्रकरणांत पोरणें गोंय पुलिसांनी 35 वर्सां पिरायेच्या सरकारी कर्मचाऱ्याक अटक केल्या.
पोरणें गोंय पुलिसांनी दिल्ले म्हायती प्रमाण, ह्या प्रकरणांत पिडीत चलयेच्या घरच्यांनी बिरेस्तारा 7 नोव्हेंबराक कागाळ दाखल केल्या. ते प्रमाण, दुबावीत सरकारी कर्मचाऱ्यान 6 नोव्हेंबराक सांजेच्या 6.30 वरांच्या सुमाराक पिडीत चली घरा वतना तिचो फाटलाव केलो. ते उपरांत वाटेरूच तिचो विनयभंग केलो, अशें कागाळेंत म्हणलां. हाची दखल घेवन पोरणें गोंय पुलीस निरिक्षक सतीश पडवळकार हाच्या मार्गदर्शना खाला उपनिरिक्षक अनीश नायक हांणी दुबाविता आड भारतीय न्याय संहितेच्या कलम 74, 78 आनी गोंय बाल कायद्याचें कलम 8 खाला गुन्यांव दाखल करून तपास सुरू केला. पुलिसांनी शुक्रारा 8 नोव्हेंबराक मध्यानरातीर 12.40 वरांच्या सुमाराक दुबाविताक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
