भांगरभूंय | प्रतिनिधी
मुख्यमंत्रीः अमेझींग गोवा परिशदेचें उक्तावण
भांगरभूंय | प्रतिनिधी
पणजी : गोंय सरकार नितळ ऊर्जेचो वापर करपी उद्देगांक फाटबळ दितलें आनी हाचे वरवीं गोंयांक पाचवेंचार करपाचो आमचो हेत आसा, अशें पणजे अमेझींग गोवा परिशदेच्या उक्तावणा वेळार मुख्यमंत्री डॉ. प्रमोद सावंत हांणी सांगलें.
ह्या वेळार उद्देग मंत्री मॉवीन गुदिन्हो, उदकास्रोत मंत्री सुभाष शिरोडकार, आदले मंत्री सुरेश प्रभू, विनय वर्मा, राजकुमार कामत, श्रीनिवास धेंपो हांचे सयत 51 देशांतले 200 परस चड प्रतिनिधी हाजीर आशिल्ले.
मुख्यमंत्र्यांनी मुखार उलयतना सांगलें, गोंय फकdत पर्यटन वेवसाया पुरतेंच मर्यादीत उरूंक ना. सैमीक वाठार, तयार केल्ल्यो गरजेच्यो सुविधा, म्हामार्ग, दोन विमानतळ, रेल्वे, बंदर अश्या जायत्या गजालींक लागून हांगा उद्देग करप बऱ्याचें जाता. हाका लागूनच हांगा फाटल्या कांय वर्सां सावन जेवण प्रक्रिया आनी हेर पाचवेचार उद्देग वाडटात. हांगा राष्ट्रीय आनी आंतरराष्ट्रीय खेळां सर्ती जातात. गोंय वॅडींग डेस्टिनेशन जाता. हांगा परिशद, बसका, अधिवेशनां घेवपाचें प्रमाणूय वाडलां, अशें सांगलें.
आमी सध्या एआय, ब्लॉक चेन, डेटा सिक्युरिटी, नुस्त्याची शेती, सायबर सुरक्षा अशा पर्यावरणाक माल पडनाशिल्ले उद्देग चालीक लायतात. उद्देजकांनी गोंयांत येवन असल्या उद्देगांनी गुंतवणूक करची. आमकां गोंयांक देशाचो अर्थीक केंद्र बिंदू करपाचो आसा. हाका लागून गरजेचें आसपी मनीसबळ तयार करपाक आमी स्किलींग, अप स्किलींग आनी रिस्किकींग सुरू केलां. हाका लागून गोंयचे तरणाटे पिळगेक नव्या आव्हानांक तोंड दिवपाक तयार करतात, अशें मुख्यमंत्र्यान म्हणलें.
केंद्रीय उद्योग राज्य मंत्री पियूष गोयल हांणी सांगलें, आमी गोंयांत मिनी सिलिकॉन व्हॅली हाडपाचो विचार करतात. हें एके तरेचें डेटा सेंटर स्टोरेज आसतलें. गोंयचें पर्यावरण सांबाळून केंद्र सरकार फाटबळ दितलें. मंत्री गुदिन्हो हांणी सांगलें, हेर सुवातींनी आनी गोंयांत गुंतवणूक करप हातूंत फरक आसा. गोंयांत तुमी वेवसायूय करपाक शकतात आनी खोशीय रावपाक शकतात. हांगच्या सैमाची आमकां राखण करपाक जाय म्हणून आमी फक्त पर्यावरण पुरक उद्देगांक फाटबळ दितले. गोंयांत गुंतवणूक वाडोवपा खातीर उद्देग खात्यान वेगवेगळीं धोरणां सुरू करतात. आमकां गोंयांक देशाचें ट्रेडिंग हब करपाक जाय अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
