भांगरभूंय | प्रतिनिधी
वाळपय, प्रतिनिधी : बरे तरेचें नियोजन आनी वेवस्थापनाक लागून अंदूं पावसांत गोंय- बेळगांव मजगतींच्या चोर्ला घांट वाठारांत येरादारी कोंयडी जावपाचे प्रकार बरेच उणे जाले. हाका लागून प्रवाशांनी समाधान उक्तायलां. बरे तरेन नियोजन आनी वेवस्थापन केल्ल्यानूच पावसांत कसलेच तरेच्यो आडखळी निर्माण जावंक ना. फाटल्या धा वर्सांचे तुळेंत अंदूं बरे तरेचें नियोजन पळोवपाक मेळटलें. अशे तरेच्यो प्रतिक्रिया प्रवाशांनी उक्तायल्यात. मुख्यमंत्री प्रमोद सावंत हांणी हाचे कडेन खासा लक्ष दिल्ले खातीर प्रवाशांनी समाधान उक्तायलें.
चोर्ला मार्ग म्हत्वाचो
मजगतीं, गोंय आनी कर्नाटक ह्या दोनूय राज्यांक जोडपी चोर्ला मार्ग हो म्हत्वाचो. गोंयच्यान बेळगांवां हांगच्यान सामकें उणें अंतर आशिल्ल्यान व्हडा प्रमाणांत प्रवासी हो मार्ग वापरतात. खासा करून गोंयच्यान लग्नाचो बाजार वा हेर कसल्याय म्हत्वाच्या सुवाळ्यांच्या सामानाची खरेदी करपा खातीर लोक बेळगांवां बाजाराक भेट दितात. हाका लागून भौशीक बांदकाम खात्यान आनी मुख्यमंत्री डॉ. सावंत हांणी विशेश लक्ष दिवन सांखळे ते चोर्ला गोंय हद्दी मेरेन नव्यान डांबरीकरण केलें. हाका लागून हो रस्तो गोंयचे हद्दींत येरादारी खातीर सुरळीत जाला. हाका लागून हांगच्यान यो वच करपी प्रवाश्यांनी समाधान उक्तायलां.
कॉन्ट्रॅक्टराचें विशेश लक्ष
मजगतीं, पावसांत चोर्ला घाटाचेर सेगीत पालसणां कोसळत आसतात. हाका लागून हो रस्तो येरादारी खातीर बंद आसता. मात फाटल्या धा वर्सांचे तुळेंत अंदूं बरे तरेन नियोजन करून कॉन्ट्रॅक्टरांच्या यंत्रणेन बरे काम केल्ल्यान हांगा येरादारी ठप्प जावपाचे प्रकार घडूंक नात. हे विशीं चड म्हायती दितना इब्राहिम ह्या कॉन्ट्रॅक्टरान सांगलें, दर दिसा आमी ह्या रस्त्याची पळोवणी करतात. हाका लागून विशेश कर्मचारी नियुक्त केल्यात. सकाळीं आनी दनपरां रस्त्याची पळोवणी केले उपरांत रस्त्यार आयिल्ल्यो आडखळी पयस करपाचेर विशेश भर दितात. बारीक सारीक कामां लेगीत रोखडींच हातांत घेंतल्यांत. हाका लागून अंदूं पालसणां कोसळपाच्यो घडणुको उण्यो जाल्यात.
उजो पालोवपी दळा कडल्यान पालव
हे खातीर वाळपय उजो पालोवपी जवानांचेंय बरे तरेन सहकार्य मेळ्ळें. जायते फावटीं घांटार झाडां पडपाच्यो घडणुको घडल्यो. उजो पालोवपी जवानांनी रोखडेंच थंय पावून तीं झाडां थंयच्यान काडलीं आनी रस्तो मेकळो केलो. अधिकारी संतोष गांवस हांणी सांगलें, अंदूं कॉन्ट्रॅक्टरान बरे तरेचें नियोजन केल्लें. उजो पालोवपी दळाच्या जवानांक त्रास सोंसचो पडलो. जायते फावट रस्त्यार आयिल्ली आडखळ तांणी पयस करून दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
