भांगरभूंय | प्रतिनिधी
83 चो प्रुडेंशियल वर्ल्ड कप भारतान जिखिल्ल्याची बातमी पळयतकच गुलजार हांणी बल्लू सरांच्या बाबाक विचारिल्लें…
ह्या 1980 तल्या क्रिकेट पंगडाच्या एका फोटवांत मुंबय- कुर्ल्याचे तीन क्रिकेटर दिसले आनी कुर्ल्यांतली क्रिकेट परंपरा याद जाली. फोटवांत काॅलर अप केल्ल्या वेंगसरकाराच्या फाटल्यान निळी पगडी घालून दिसतात ते बलविंदर संधू. सकयल बसल्यात निळ्या जर्सींतले सुरू नायक, सुनील गावस्कराचे दावे वटेन शरद राव. ह्या फोटवांत नाशिल्ले कुर्ला नेहरु नगरांतल्या 96 क्र. इमारतींत रावपी सुधीर नायक हे क्रिकेटर तीन टेस्ट मॅची खेळ्ळे आनी वनडेंत भारता वतीन इंग्लंडांत पयलो चौको मारपाचो विक्रम तांच्या नांवाचेर आसा.
बलविंदर आनी शरद राव तर आमच्या कुर्ल्यातल्या नेहरू नगर म्हाडा काॅलनींतले. सुरू नायक शेजारच्या कामगार नगरांतले. सुरू नायक आनी शरद राव हांचे कडेन म्हजो संबंद येवंक ना. पूण बलविंदरजी हांकां हांव म्हज्य ल्हानपणा सावन पळयतां. आमची वळख मात हालींच्या कांय वर्सांतली.
बलविंदर संधू हांकां हांव बल्लू सर म्हणटां. काॅलनींतले तांचे पिरायेचे वागडी आयजूय तांकां बल्लू म्हणटात. बल्लू सर 1983 च्या कपिल देव हांच्या वर्ल्ड कप टिमींत आसले. तांणी गाॅर्डन ग्रीनीजाची विकेट काडून भारताच्या जैताची सुरवात करून दिल्ली. बाॅल भायर वतलो म्हूण ग्रीनीजान तो सोडलो आनी तो अचकीत भितर येवन ग्रीनीज क्लीन बोल्ड जाल्लो. बल्लू सर नेहरूनगराच्या मैदाना लागसारच्या 27 नंबर इमारतींत रावताले. तांचे बाबा हिंदी कवी. नामनेचे गीतकार, कवी, दिग्दर्शक गुलजार तांचे लागींचे इश्ट. 83 चो प्रुडेंशियल वर्ल्ड कप भारतान जिखिल्ल्याची बातमी पळयतकच गुलजार हांणी बल्लू सरांच्या बाबाक विचारिल्लें, ‘तुने कभी बताया नहीं तेरा बेटा क्रिकेट खेलता है?’ चेंबूर क्लबाच्या स्वीमिंग पुलाच्या उदका कडेन पळयत बल्लू सरान म्हाका सांगिल्लें, ‘83 का वर्ल्ड कप जीतने के बाद पेहली बार पिताजीने मुझे गले लगाया था!’
सिनेमाची खास आवड आशिल्ल्या बल्लू सरान हालींच म्हजी एक स्क्रिप्ट थेट नाना पाटेकरांक सांगिल्ली. मागीर नानान म्हाका फोन केल्लो. कुर्ल्याचे नेहरूनगर काॅलनींत ल्हानपणांत म्हाका गणपती उत्सवांत चित्रकला सर्तींत इनाम मेळिल्लें, तेन्ना इनाम वितरण सुवाळ्याक बल्लू सर तांचे इश्ट क्रिकेटर संदीप पाटील हांकां घेवन आयिल्ले. हांवें तांचे हस्तुकीं इनाम स्विकारिल्लें. ही याद हांवें बल्लू सरांक सांगली, पूण ते हो प्रसंग पुराय विसरुन गेल्यात.
बलविंदर संधू खूब सादें व्यक्तीमत्व. 83 चो वर्ल्ड कप जिखून विदेशांतल्यान येतकच ते सकाळीं बेगीन उठून सदचे भशेन नेहरूनगराच्या थळावे क्रिकेट टीमीच्या सरावा खातीर ते हाजीर रावले. टीम मुखेल्यान तांकां सांगलें, ‘तुमी आतां वर्ल्ड चॅम्पियन आंतरराष्ट्रीय क्रिकेटर जाल्यात, थोडें उसरां आयले तरी म्हजी हरकत ना.’ हाचेर बल्लू सरान म्हणलें, ‘हांव व्हडलो जालां, अशें तुमकां दिसता, पूण म्हाका तर हांव तोच सेम ओल्ड बलविंदर संधू दिसतां.’
कुर्ला वाठाराचें एक खाशेलेपण आसा. मनीस व्हडले जाले तरी काळा वांगडा रावतात आनी तांचे पांय जमनीरुच आसतात.
83 चो वर्ल्ड कप भारतान जिखपाच्या कांय म्हयने आदली गजाल. बलविंदर संधू नेहरूनगराच्या रस्त्याचेर इश्टां वागंडा क्रिकेट खेळटाले. बाॅलरान मारिल्लो बॉल थेट तळमजल्या वयल्या घरांत गेलो. घर मालकिणीन बॉल दिना म्हूण सांगलें. हो कितें क्रिकेट खेळपाचो जागो… अशी तिची बडबड चलताली. बल्लू सर मुखार आयले आनी तिका म्हणलें, ‘आंटी बाॅल दे दो ना प्लीज…… क्या पता कल हम में से कोई वर्ल्ड कप भी लेकर आये!’ बल्लू सर हें वाक्य सहज उलोवन गेल्ले, पूण तो देवाचो संकेत आशिल्लो. कांय म्हयन्यांनी बलविंदर संधू हांची 83 च्या वर्ल्ड कपा खातीर भारतीय पंगडांत निवड जाली. कपिल देव हांच्या फुडारपणा खाला खेळत बल्लू सरान आपलें म्हत्वाचें योगदान दित वर्ल्ड कप भारता कडेन ओडून हाडलो. सर्वसामान्य वा अंडरडाॅग श्रेणींतल्या भारतीय क्रिकेट पंगडान इतली व्हडली कामगिरी करुन संवसाराक अजापीत केल्लें. कारण त्या वेळार वेस्ट इंडिज म्हणल्यार वन डे चे दादा.
भारताच्या ह्या संवसारीक जैताची गजाल सांगपी ‘83’ हो कबीर खान दिग्दर्शित चित्रपट कांय वर्सां पयलीं आयलो. तातूंतल्या क्रिकेटर्सांची भुमिका करपी सगल्या कलाकारांनी बलविंदर संधू हांचे तालमीत क्रिकेटीचे कांय बारकावे शिकिल्ले.
बल्लू सर क्रिकेट कोच म्हणून संवसारभर भोंवत आसतात, पूण जेन्ना- जेन्ना कुर्ला नेहरूनगर हंकां क्रिकेटी कडेन संबंदीत कार्यावळीचें तांका आमंत्रण आसता, तेन्ना ते चुकनासतना हाजीर रावतात.
(लेखक सिने पटकथा लेखक आसात.)
– अविनाश भानूआशा घोडके
98921 66366
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
