रेंव, चिऱ्यां खणीं माफिया पसून राखण दियात

भांगरभूंय | प्रतिनिधी

उत्तर गोंयच्या तलाठ्यांचो जिल्लोधिकाऱ्यांक उलो

भांगरभूंय । प्रतिनिधी

पणजीः गोंय सरकारान बेकायदेशीर गजालींचेर खर दखल घेतल्या. सरकाराच्या आदेशांक पाळो दीत तलाठी कसलीच सुरक्षा आनी पोलिसांचें संरक्षण नासतना एकटेच सुवातीचेर पळोवणी करपाक वतात. तांचेर केन्नाय हल्लो करपा सारक्यो घडणुको जावपाक शकतात. ते खातीर रेंव काडपाच्या आनी चिऱ्यां खणींचे सुवातीचेर पळोवणी करपाक वतना तांची सुरक्षा गरजेची, अशी मागणी करपी निवेदन उत्तर गोंयच्या तलाठ्यांनी जिल्होधिकारी स्नेहा गिते हांकां भेटयलां.

मेणकुरे पंचायतीचे तलाठी फटगो पालकार हे पळोवणी करून आयले उपरांत तांचे कचेरेंत तांकां दोग जाणांनी मारबडय करपाची घडणूक घडिल्ली. ह्या प्रकरणांत अजून मेरेन कोणाकूच अटक जावंक ना. हे घडणुकेचो पुराय उत्तर गोंयच्या तलाठ्यांनी निशेध उक्तायला आनी तलाठ्यांचे सुरक्षे विशीं उत्तर गोंय जिल्होधिकारी स्नेहा गिते हांची भेट घेवन खोलायेन चर्चा केली.

हे विशीं जिल्होधिकाऱ्यांक तांणी निवेदन भेटयलें. निवेदनांत म्हणलां, बेकायदो बांदकाम, जमीन रुपांतरण, दोंगर कांपणी, रेंव काडप, चिऱ्यां खणीं, नोटीस चुकोवप ह्या सारिकिल्ल्या गजालीचेंर सरकारान हालींच नेमांची खर अंमलबजावणी केल्या. हे विशीं कारवाय करपा खातीर तलाठ्यांक गांवगिऱ्या आनी सामसूम वाठारांनी वच्चें पडटा, केन्ना रातचे लेगीत धांवचें पडटा. पूण सुवातेचेर वतना तांकां पुलिसांचें संरक्षण नासता. देखून सुवातींचेर तलाठ्यांक मारबडय जावपाची शक्यताय आसा, खासा करून बायला तलाठी कर्मचाऱ्यांचे बाबतींत. ताका लागून रेंव काडपाचे आनी चिऱ्या खणीचे सुवातेर पळोवणे वेळार तलाठ्यांचें हीत राखपा खातीर तांची सुरक्षा खूब गरजेची.

बसके उपरांत उलयतना तलाठी फटगो पालकार हांणी सांगलें, तांकां कचेरेंत येवन मारबडय करपाचे घडणुकेक चार दीस जाले. एफआयआर नोंद केल्या, पुण अजून मेरेन फुडली कसलीच कारवाय पुलिसांनी करूंक ना. ह्या विशयांत लक्ष दिवचे म्हूण आमी आमच्या महसूल खात्याची मुखेली जिल्होधिकारी गिते हांकां मेळपाक आयिल्ले. जिल्होधिकाऱ्यान हे विशीं लक्ष घालून दोशींचेर कारवाय करपाचें आस्वासन दिलां, अशें मेणकुरेंचो पिडीत तलाठी पालकार हांणी सांगलें.

मारबडय घडणुके विशीं सविस्तर म्हायती दितना पालकर हांणी सांगलें, शुक्रारा 1 नोव्हेंबराक तांणी मेणकुरे पंचायतीचो ताबो घेतिल्लो आनी सोमारा 4 वेर दिवचल उप जिल्होधिकाऱ्याक भेटयल्या निवेदनाची प्रत तांकां दिली.

ह्या निवेदना संदर्भात कारवाय करतना निवेदन भेटोवपी चलो आनी आपूण सुवातीचे सर्वेक्षण करपाक गेले. 10-15 मिण्टां भितर आमचें सर्वेक्षण पुराय जालें आनी तो चलो आपल्याक म्हजे कचेरेंत सोडून परत गेलो. जेन्ना आपूण कचेरेंत बशिल्लों तेन्ना दोग जाण आयले आनी आपल्या वांगडा वाद घालून गाळी संवपाक लागले. अचकीत तांणी आपल्याचेर हल्लो करून मारबडय केली आनी ताचो व्हिडियो काडलो, अशें पालकार हांणी सांगलें.

घडणुके उपरांत आपणें मामलेदार आनी पुलीस निरिक्षकाक फोन केलो. पुलीस निरिक्षकान फोन उखलूंक ना, पूण मामलेदारान उखल्लो आनी तांणी पुलीस धाडले. पुलीस ये मेरेन आपूण घडणुकेचे सुवातेर रावलो, उपरांत एफआयआर करपाक पुलीस स्टेशनांत गेलो. दुबावीत संजय नायक आनी अशोक नायक हांचे आड कागाळ दाखल केल्या, अशें पालकर हांणी सांगलें. जिल्होधिकाऱ्या वांगडार आमची बरी चर्चा जाल्या आनी आमचें निवेदन वाचले उपरांत आपलो निर्णय कळयतां, अशें जिल्लोधिकाऱ्यान सांगलां. आमकां ठोस अशें आस्वासन मेळूंक ना. हे विशीं चवकशी जातली अशें जिल्होधिकाऱ्यान सांगलां. सध्या तरी आमच्या खात्याची मुखेली जिल्होधिकारी कसलो निर्णय घेता हाची वाट पळयतात. निर्णय आयले उपरांतूच आमी फुडलें पावल उखलतले. आपल्याक न्याय हो मेळपाकूच जाय, ना जाल्यार सरकारी अधिकाऱ्यांक कोणूय येतलो आनी कोणूय मारून वतलो. अशें जावपाक जायना, अशें पालकार हांणी सांगलें.