भांगरभूंय | प्रतिनिधी
अहदाबाद शारांतल्या नरेंद्र मोदी स्टेडीयमाचेर चालू आशिल्ले रणजी प्लेट गटांतले मिझोरम पंगडा आडचे चार दिसांचे लडतींत गोंय पंगडान आपलो शेक दवरपाक येस मेळयलें. मॅचीच्या दुसऱ्या दिसाचे अखेर मेरेन गोंयान आपलो पयलो डाव 9 बाद 555 धांवड्यांचेर घोशीत केल्या उपरांत मिझोरामची स्थिती 6 बाद 122 अशी नाजूक करून उडयल्या.
गोंय पंगड अजून 433 धांवड्यांची मुखार आसा. मिझोरमाक फोलॉओन टाळपा खातीर अजून 284 धांवड्यांची गरज आसा. ते पयलीं 3 बाद 322 धांवड्यां वयल्यान मुखार खेळपाक सुरवात करपी गोंयान आपलो पयलो डाव 9 बाद 555 धांवड्यांचेर घोशीत केला. पयल्या दिसा नाबाद खेळगडो स्नेहल कवठणकारान आपलो दोट्टी शेंकडो पुर्ण केलो. ताणें 342 बॉलांनी 250 धांवड्यो केल्यो. हातूंत 25 चवक्यांचो आस्पाव आशिल्लो. रणजी क्रिकेट सर्तींत 250 धांवड्यो करपी स्नेहल गोंयचो फकत तिसरो खेळगडो थारलो.
स्नेहल आनी दीपराज गांवकारान चवथे विकेटी खातीर 133 धांवड्यांची भागिदारी केली. दीपराज बाद जाल्या उपरांत स्नेहलान दर्शन मिशाळ, समर दुभाषी आनी राहुल मेहता हांच्या वांगडा अर्द शेंकड्यांच्यो भागिदाऱ्यो केल्यो. मिझोरमा वतीन मोहीत जांगरा आनी के सी करिअप्पा हाणें दरेकी 3 विकेटी घेतल्यो. मोझेसान 2 जाल्यार बॉबीन एक विकेट घेतली.
मिझोरमाची सुरवात बाबत जाली. पयलीं दर्शन मिशाळान लालरियातरेंगाक वैयक्तीक 16 धांवड्यांचेर बाद केलो. समर दुभाषीन ताची कॅच धरली. ते उपरांत अंदूंचे रणजी हंगामांत सगल्यांत चड धांवड्यो करून पयले सुवातेर आशिल्ल्या अग्नी चोपडाक मोहीत रेडकारान एलबीडब्ल्यू बाद केलो. दर्शन आनी मोहीत हांणी गोंयाक आनी येस मेळोवन दितना मार्टी आनी थानखुमा हांकां बाद करून मिझोरमाची 4 बाद 35 अशी बिकेट स्थिती केली. अर्जुन तेंडुलकरान जांगराक बाद केल्या उपरांत दुसऱ्या दिसाचे निमाणे ओव्हरीच्या पयल्याच बॉलाचेर दर्शन मिशाळान विकासकुमाराक बोल्ड करून मिझोरमाक बॅकफुटाचेर धुकल्लो.
खेळ सोंपलो त्या वेळार जेहू अॅण्डरसन 45 धांवड्यांचेर खेळटालो. गोंया वतीन दर्शन मिशाळान 3, मोहीत रेडकारान 2 जाल्यार अर्जुन तेंडुलकरान एक विकेट घेतली.
थोडे भितर धांवतकटोः गोंय (पयलो डाव) 3 बाद 322 धांवड्यां वयल्यान 142.4 ओव्हरींनी 9 बाद 555 डाव घोशीत ( स्नेहल कवठणकार 250, दीपराज गांवकार 55, दर्शन मिशाळ 25, समर दुभाषी 17, राहुल मेहता 48, अर्जुन तेंडुलकर 0, मोहीत रेडकार नाबाद 8, हेरंब परब नाबाद 12 धांवड्यो).
बॉलींगः मोहीत जांगरा 44-5-167-3, के सी करिअप्पा 58.4-7-172-3, बॉबी 20-2-82-1, मोझेस 16-0-95-2).
मिझोरम (पयलो डाव) 36.1 ओव्हरींनी 6 बाद 122 धांवड्यो (लालरियातरेंगा 16, मार्टी 10, अग्नी चोपडा 1, थांखुमा 0, जेहू अॅण्डरसन खेळटा 45, मोहीत जांगरा 25, विकासकुमार 19 धांवड्यो).
बॉलींगः हेरंब परब 3-1-10-0, अर्जुन तेंडुलकर 7-1-22-1, दर्शन मिशाळ 11.1-2-33-3, मोहीत रेडकार 11-2-43-2, राहुल मेहता 4-2-10-0).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
