भांगरभूंय | प्रतिनिधी
दीपश्री सावंता आड अॅड. शैलेश गांवस हांची म्हाड्डोळ पुलिशेंत कागाळ
भांगरभूंय । प्रतिनिधी
फोंडें: माशेल वाठारांत नगरनियोजन आनी रान खात्यांत सरकारी नोकरेचें हांयस दाखोवन 44 जाणां कडल्यान सुमार 4 कोटी रुपया घेवन दीपश्री सावंत हिणें फटवणूक केल्ल्याची कागाळ बिरेस्तारा म्हाड्डोळ पुलीस स्टेशनार अॅड. शैलेश गांवस हांणी दाखल केल्या. सगल्यांत पयलीं संदीप परब ह्या दुकानकाराचे धुवेक नोकरेचें हांयस दाखोवन ते उपरांत हेरां कडल्यान व्हड रक्कम घेतली. कांय जाणांक सरकारी नोकरी दिल्ल्याचीं कागदपत्रां दाखयल्ल्यान खूब जाण भकीक पडिल्ल्याचें दिसून येता. म्हाड्डोळ पुलिसांनी सांजे मेरेन गुन्यांव दाखल करूंक नाशिल्लो.
अॅड. शैलेश गांवस हांणी दाखल केल्ले कागाळेंत म्हणलां, दीपश्री सावंत हिणें नोव्हेंबर 2023 त सगल्यांत पयलीं दुकानकार संदीप परब हांचे कडेन वळख केली. ते उपरांत कांय राजकी फुडाऱ्यां वांगडा काडिल्ले फोटो दाखोवन आपूण सरकारी कर्मचारी आशिल्ल्यान इत्सुकांक सरकारी नोकऱ्यो वळखीच्या राजकी मळा वयल्यान लोकां कडल्यान दिवपाचें हांयस दाखयलें. संदप परब हांणी सगल्यांत पयलीं आपले धुवेक नगरनियोजन खात्यांत नोकरी दिवपा खातीर 8 लाख रुपयांचो वेव्हार केलो. तातूंतले 3 लाख आगावू दिले. दीपश्री सावंत हिणें आनीक नोकऱ्यो दिवपा खातीर संदीप परब हांकां हांयस दाखोवन खूब जाणां कडल्यान रक्कम घेवपाक सांगलें. ते प्रमाण संदीप परब हांणी 44 जाणां कडल्यान सुमार 4 कोटी रुपया घेवन दीपश्री सावंत हिका दिले. सरकारी नोकऱ्यो लोकसभा वेंचणुके उपरांत दिवपाचें आस्वासन दिल्लें. पूण ते उपरांत कांय जाणांक दुबाव आयिल्ल्यान रक्कम परत मागपाक सुरवात केली. तातूंतले 25 लाख 80 हजार दीपश्री सावंत हिणें संदीप परब हांचे कडेन परतून दिल्ले.
पुलीस स्टेशनार रितसर कागाळ दाखल केले उपरांत अदीक म्हायती दितना अॅड. शैलेश गांवस हांणी सांगलें, सध्या संदीप परब हांचे धुवेक धमक्यो दिवपाक सुरवात जाल्या. सरकारी कागदपत्रांचो वापर करून सरकारी नोकऱ्यो दिवपाचीं हांयसां दाखयल्यात. राजकी फुडाऱ्यां कडेन संपर्क आशिल्ल्याचे फोटो दाखोवन खूब जाणांची फटवणूक केल्या. तातूंत कोणाचो तरी आशिर्वाद आशिल्ल्यानूच गोंयांत सध्या फटवणुकेचे प्रकार वाडिल्ल्याचें दिसता. लोकांची फटवणूक करप्यां आड खर कारवाय करपाची गरज आसा, अशें तांणी सांगलें.
मजगतीं, सरकारी नोकरी दिवपा खातीर लाखांनी रुपया घेवन फटवणूक केल्ल्या प्रकरणांत फोंडें पुलिसांनी अटक केल्ले दीपश्री सावंत हिका बिरेस्तारा परतून न्यायालयांत उबी केली. त्या वेळार न्यायाधिशान 5 दीस पुलीस कोठडेंत दवरपाचो आदेश दिलो. फोंडें पुलिसांनी हे आदीं दीपश्री सावंत हिचे मालकीच्यो तीन मोटारी आनी दोन स्कुटरी जप्त केल्यात.
‘दीपश्री – पुजा मदीं कनेक्शन’
सरकारी नोकरी दिवपाचें हांयस दाखोवन खूब जाणांची फटवणूक करपी दीपश्री सावंत आनी पुजा नायक हांचे मदीं कनेक्शन आशिल्ल्याचो आरोप अॅड. शैलेश गांवस हांणी केलो. पुलिसांनी ह्या प्रकरणांत चेपणाक बळी पडनासतना खोलायेन चवकसी करची, अशी मागणी कागाळदार अॅड. गांवस हांणी केल्या.
दरेकल्या कडल्यान घेतल्यात 3 ते 20 लाख
म्हाड्डोळ पुलिशेंत दाखल केल्ले कागाळी प्रमाण दीपश्री सावंत हिणें 44 जाणांक विवीध सरकारी खात्यांत कनिश्ठ लिपीक, तंत्रीक सहाय्यक, स्टेनोग्राफर, अबकारी निरिक्षक, कनिश्ठ अभियंते, एमटीएस तशेंच हेर पदांचेर नोकरी दिवपाचें हांयस दाखयल्लें. तशेंच सगल्यांत चड 20 लाख जाल्यार उण्यांत उणे 3 लाख रुपया घेतिल्ल्याची म्हायती कागाळेंत नमूद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
