भांगरभूंय | प्रतिनिधी
कोलवाळ पुलिशेंत अनवळख्या आड गुन्यांव दाखल
म्हापशें: एटीएम कार्ड ब्लॉक जाल्ल्याचें भासोवन एका निवृत्त रेल्वे कर्मचाऱ्याक 3.18 लाखांची तोपी घाली. ह्या प्रकरणांत कोलवाळ पुलिसांनी अनवळख्यां आड गुन्यांव नोंद केला.
ही घडणूक 30 ऑक्टोबर दिसा घडली. जाल्यार कागाळदार जोजफ डिसोझा (रा. शिरसय आनी मूळ मुंबय) हांणी बुधवारा 6 वेर पुलिशेंत कागाळ दाखल केली. कागाळदाराक तुमचें बँक ऑफ इंडियाचें एटीएम कार्ड ब्लॉक केलां असो अनवळखी क्रमांका वेल्यान एक मॅसेज आयलो.
हो संदेश बँके कडल्यान तांच्या पेन्शना कडेन संबंदीत आसतलो अशें गृहीत धरून कागाळदारान कार्ड अनलॉक करपा खातीर थंय दिल्ल्या मोबायलाचेर कॉल केलो. तेन्ना दुबाविताक आधार कार्डाचो तपशील दिलो. उपरांत ओटीपी शॅर केलो. उपरांत दुबावितांनी तांच्या बँकेच्या सेव्हींग आनी पेन्शन खात्यांतल्यान वट्ट 3 लाख 18 हजार 173 रुपया रक्कम हस्तांतरी केली.
आपली फटवणूक जाल्ल्याचें समजतकच कागाळदारान कोलवाळ पुलीस स्टेशनार धांव घेतली आनी कागाळ दाखल केली. ते प्रमाण पुलिसांनी भा.न्या.सं.च्या 318, 319 आनी म्हायती तंत्रज्ञान कायदो कलम 66-ड खाला अनवळख्यां आड गुन्यांव नोंद केलो.
फुडलो तपास पुलीस निरिक्षक विजय राणे हांच्या मार्गदर्शना खाला भरत खरत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
