भांगरभूंय | प्रतिनिधी
मुख्याधिकाऱ्यांनी काडली नोटीस
मडगांव: मडगांव नगरपालिके कडल्यान पालिका वाठारांत उक्तडार शौच केल्यार 100 रुपया दंड जाल्यार उक्तडार मुत्ता आसतना दिसून आयल्यार 50 रुपया दंड फारीक करचो पडटलो अशी जाहीर नोटीस पालिका मुख्याधिकाऱ्यांनी काडल्या.
मडगांव पालिका वाठारांत उक्तडार शौच आनी मुतपाच्या प्रकारांनी वाड जाल्ल्याचें दिसून आयलां. गोंया भायल्यान आयिल्ल्या लोकां कडल्यान व्हड प्रमाणांत उक्तडार घाण करपाचे प्रकार घडत आसात. हेच फाटभुंयेर मडगांव पालिका मुख्याधिकारी मेलवीन वाझ हांणी जाहीर नोटीस काडून पालिका वाठारांत उक्तडार शौच केल्यार आनी मुतत जाल्यार दंडात्मक कारवाय करतले अशी शिटकावणी दिल्या.
हे नोटिसी प्रमाण उक्तडार शौच करतना दिसून आयल्यार पयलीं 100 रुपया आनी उपरांत शंबर रुपयांच्या टप्प्यांत दर फावटी दंडात वाड करतले अशें म्हणलां.
मडगांवचे समाजीक कार्यकर्ते प्रभव नायक हांणी मडगांव पालिकेच्या ह्या निर्णयाचेर उलोवप करतना राज्य सरकारान राज्य उक्तडार शौचमुक्त जाहीर केल्लें आसतना मडगांव पालिकेचे जाहीर नोटिसीक लागून राज्य सरकाराच्या दाव्याचेर प्रस्न निर्माण जाल्ल्याचें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
