भांगरभूंय | प्रतिनिधी
शॅर ट्रेडिंगांत चड मोबदलो दिवपाचें दाखयलें हांयस
पणजी : शॅर ट्रेडिंगांत चड मोबदलो दिवपाचें हांयस दाखोवन वाळपय- सत्तरी हांगासरल्या एकल्याक 1.03 कोटी रुपयांची तोपी घाली. ह्या प्रकरणांत सायबर विभागान कुमार उत्लासर (50, बंगळूर, कर्नाटक) ह्या दुबाविताक अटक केल्या. दुबाविताच्या बॅंक खात्याची तपासणी केली तेन्ना, ताच्या खात्यांत हेर 9 राज्यांतल्या मनशां कडल्यान सुमार 2.3 कोटी रुपया जमा जाल्ल्याचें मुखार आयलां.
सायबर विभागान दिल्ले म्हायती प्रमाण ह्या प्रकरणांत वाळपय- सत्तरी हांगासरल्या एका मनशान 22 ऑक्टोबर दिसा कागाळ दाखल केल्या. ते प्रमाण 3 ऑक्टोबर पयलीं अनवळखी मनशान ताचे कडेन व्हॉट्सअॅप, टेलिग्राम आनी सोशल मिडियाच्या हेर माध्यमां वरवीं संपर्क सादून तांकां शॅर ट्रेडिंगांत पयशे गुथयल्यार चड मोबदलो दिवपाचें हांयस दाखयलें.
उपरांत कागाळदाराक “A-33 High-Quality Stocks Exchange Group” ह्या सोशल मिडियाच्या ग्रुपांत आस्पावन घेतलो. उपरांत ताका SMIFSMAX अॅप डावनलोड करपाक लायलें. त्या अॅपा वरवीं कागाळदाराक विवीध बॅंकांच्या खात्यांत सुमार 1 कोटी 3 लाख 28 हजार रुपया जमा करपाक भाग पाडलें.
कांय काळा उपरांत संबंदीत अॅपांत कागाळदाराचे खातें ब्लॉक केलें. ह्याच वेळार फटवणूक जायत आशिल्ल्याचें लक्षांत आयले उपरांत कागाळदारान सायबर विभागांत धांव घेवन आपली सुमार 1 कोटी 3 लाख 28 हजार रुपयांची फटवणूक जाल्ल्याची कागाळ दाखल केली.
ह्या कागाळीची दखल घेवन सायबर विभागाचे पुलीस अधिक्षक राहूल गुप्ता हांच्या मार्गदर्शना खाला निरिक्षक दीपक पेडणेंकार हांणी अनवळखी मनशा आड भारतीय न्याय संहितेच्या कलम 318(4), 319 (2), 319(2) आरडब्ल्यू 3(5) आनी म्हायती आनी तंत्रज्ञान कायद्याच्या कलम 66 ‘डी’ खाला गुन्यांव दाखल करून तपास सुरू केला.
ह्याच वेळार बंगळुरू कर्नाटक हांगासरल्या Aurinko Diensten ह्या आस्थापनाच्या खात्यांत कागाळदारान रक्कम जमा केल्ल्याचें मुखार आयलें. तशेंच त्या बॅंक खात्यांतल्यान 6 लाख रुपया काडिल्ल्याचें मुखार आयलें. ते प्रमाण पुलीस अधिक्षक राहूल गुप्ता हांच्या मार्गदर्शना खाला निरिक्षक दीपक पेडणेंकार हांच्या फुडारपणा खाला उपनिरिक्षक नवीन नायक, काॅ. अक्षय नायक आनी सुमय भगत ह्या पंगडाक वयले सुवातेर धाडून दिले. उपरांत पंगडान कुमार उत्लासर ह्या बॅंकधारकाचो सोद लायलो. ताची चवकशी करून ताका गोंयांत हाडून अटक केली.
मजगतीं, सायबर विभागान ताच्या बॅंक खात्याची जवकशी केली तेन्ना, णव वेगळ्यावेगळ्या राज्यांनी अशेच तरेची फटवणूक ताणें केल्ल्याचें मुखार आयलें. तशेंच त्या खात्यांतल्यान वट्ट 2 कोटी 30 लाख रुपयांचाे वेव्हार जाल्ल्याचेंय मुखार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
