भांगरभूंय | प्रतिनिधी
पणजी : गोंय हस्तकला, कापड आनी काथो खात्यान आपले विश्वकर्मा कौशल्य येवजणेंत सुदारणा केल्या. येवजणेंत बदल करून हस्तकला विशीं प्रशिक्षण फायद्यांत वाड केल्या. प्रशिक्षण दिवपी कारागीरां खातीर शिक्षणाची मर्यादा काडून पिरायेची मर्यादा वाडयल्या. रोखडीच हे विशींची अधिसुचोवणी राजपत्रांत उजावाडाक येवन हो निर्णय चालीक लागतलो.
खात्याची एकात्मीक कौशल्य उदरगत येवजण २०१४ हिचें नांव बदलून ‘विश्वकर्मा कौशल्य येवजण’ दवरलां. हे येवजणे खाला हस्तकला मळार कुशळ कारागीर तयार करपाक खातें प्रशिक्षण सत्रां घेता. प्रशिक्षक म्हूण खातें कुशळ कारागीर वा परंपरीक कारागीर हांची नेमणूक करता. ह्या कारागीरां खातीर खात्यान नेमान कांय बदल केल्यात.
प्रशिक्षणाचे पात्रतायेंत बदल करून जे परंपरीक कारागीर आसात तांचे खातीर शैक्षणीक पात्रताय ही अट आतां काडल्या. पयली यत्ता पांचवी पास ही शिक्षणीक पात्रताय अट परंपरीक कारागीरांक प्रशिक्षक पदाचेर आसली.
जे परंपरीक कारागीर आसात तांकां प्रशिक्षक पदां खातीर कसलेच तरेची पिरायेची मर्यादा ना. मात जे हेर कारागीर आसात तांचे पिराय मर्यादेंत बदल करून ती ६० वर्सां पिराये मेरेन वाडयल्या. आदीं ही मर्यादा १८ ते ६० वर्सा पिराये मेरेन आसली. आतां नवे येवजणेंत ही मर्यादा १८ ते ४५ वर्सा पिराये मेरेन वाडयल्या.
हे प्रशिक्षकांचे नियुक्ती खातीर तीन वांगड्यांची समिती थापणूक करतले. तातूंत खात्याचे सहाय्यक संचालक/ तांत्रिकी अधिकारी अध्यक्ष, डिजायनर/ हेड क्लर्क वांगडी आनी निरिक्षक हे वांगडी सचीव पदार आसतले. प्रशिक्षण कार्याशाळा ग्राम पंचायत वा लागींच्या सरकारी कार्यालयांत आसतले. जे सुवातेर ह्यो सुविधा नात थंय ही कार्यशाळा कारागीरांच्या घरांत घेतले. हे खातीर ग्रामीण वाठारांतल्या घर धनयांक म्हयन्याक रु. ४००० आनी पालिका वाठारांतल्या घर धनयांक रु. ६००० इतलें भाडें दिवपाचें नवे येवजणेंत निश्चीत जालां. आदले येवजणेंत गांवगिर्या वाठारांतल्या घर धनयांक रु. ३५०० आनी पालिका वाठारांतल्या घर धनयांक रु. ५००० दर म्हयन्याक भाडें मेळटालें.
हे येवजणेंतल्यान प्रशिक्षक हो निकश काडून उडोवन त्या जाग्यार मँन्टोर, विणकाम मास्टर, विणकाम सहाय्यक, मास्टर प्रशिक्षक आनी सहाय्यक प्रशिक्षक कार्यावळी घेतले. जर हे प्रशिक्षक खात्या कडेन नात जाल्यार तांकां कंत्राटी पद्धतीचेर आस्पावन घेवपाची तरतूद खात्यान केल्या.
मँन्टोरांक रु. ८०० मेरेन, विणकाम मास्टरांक रु. ६०० मेरेन आनी विणकाम सहाय्यकांक रु. ४०० मेरेन दर दिसाचें वेतन मेळटलें. जाल्यार विवीध वेवसायांत प्रशिक्षण दिवपी मास्टर प्रशिक्षक हांकां रु. १४,२०० आनी सहाय्यक प्रशिक्षकांक रु. ११,४८० दर म्हयन्याक वेतन दितले. तशेंच ते आठ किलोमिटर चड प्रवास करतात जाल्यार तांकां बसीचें भाडें लेगीत मेळटलें, अशें खात्यान काडिल्ले अधिसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
