भांगरभूंय | प्रतिनिधी
जोयडा : बरो पावस पडल्यार पिकूय बरें मेळटा. अंदूं शेतांतल्या पिकांक जाय तसो पावस पडलो आनी ताका लागून पिकूय बरें लागलें. मात अश्या रसरशीत शेतांचेर रानवटी जनावरांची नदर पडल्यार मात त्या पिकाचें लुकसाण जालेंच समजपाचें. अशीच गोंयच्या कुशीकूच आशिल्ल्या अस्तंत घांटांतल्या खानापूर आनी सिद्दापूर म्हालांतल्या शेतांचेर एका हतयान ताव मारिल्ल्यान शेतकारांक बरेंच व्हड लुकसाण सोंसचें पडटा. हो हती दीस आनी रात शेतांनी घुसून पिकांचें व्हडा प्रमाणांत लुकसाण केल्ल्यान शेतकार आतां शेतांनी वचपाकूय भियेवपाक लागल्यात. ताका लागून रान विभागान ह्या हत्तीचो कितेंय बंदोबस्त करपाची मागणी शेतकार करतात.
खानापूर म्हालांतल्या जळगे वाठारांत फाटल्या चार दिसां सावन एकलो हती शेतकर्यांच्या शेतांनी भितर सरला. शेतकारांनी भात कांपणी करून दवरिल्लें पीक हती येवन काबार करता. सुगीच्या कामां खातीर शेतकार शेतांनी वचपाक भियेतात. ताका लागून शेतांतलीं सगळीं कामां तशींच उरल्यांत. ह्या हतयान जळगे हांगच्या मुरलीधर पाटील आनी प्रमोद पाटील हांचे मळणे खातीर तयार आशिल्ली पिकांची रास उध्वस्त केल्ल्यान तांचे व्हड लुकसाण जालां. दोन दिवसांनी तांणी मळणीचें नियोजन केल्लें. ताचे पयलींच मंगळारा हतयान भाताची रास सगळी मातयेभरवण केली.
करंबळ, जळगे वाठारांतल्या खुबश्या शेतकारांच्या भात पिकांचें हती लुकसाण करपाक लागला. ह्या हतयाचो बंदोबस्त करपाचे मागणेचेर शेतकारांनी नेट धरला. रान विभागाचे अधिकारी फकत हतयाचो कितेंय उपाय काडपाक आनी लुकसाणेचो पंचनामो करपांतूच व्यस्त आसतना दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
