भांगरभूंय | प्रतिनिधी
म्हापशें: आल्तो पर्वरे प्रिया मणेरकार हिका सरकारी नोकरी मेळोवन दिवपाचें हांयस दाखोवन तिका 4 लाख रुपयांक तोपी घाल्ली. ह्या प्रकरणांत दुबावीत आरोपी पुजा नायक हिका पर्वरी पुलिसांनी बुधवारा सांजवेळा अटक केली.
दुबावीत आरोपी पुजा नायक हिका अशाच फटवणुकीच्या प्रकरणांत दिवचल पुलिसांनी फाटल्या 29 ऑक्टोबर दिसा अटक केल्ली. उपरांत न्यायालयान तिका न्यायालयीन कोठी दिल्ली. थंय सावन हस्तांतरीत पद्दतीन पर्वरी पुलिसांनी ताब्यांत घेवन वयल्या प्रकरणांत रितसर अटक केली.
मजगतीं, सरकारी नोकरीचें हांयस दाखोवन पुजा नायक हिणें खूबशा जाणांक तोपी घाल्ल्याचो प्रकार उक्तडार आयिल्लो. तिचे आड म्हाड्डोळ पुलिशेंत गुन्यांव दाखल जाल्लो. हेच दुबावीत बायलेन आपली लेगीत फटवणूक केल्ली हाची खात्री जाले उपतरां 23 ऑक्टोबर दिसा कागाळदार प्रिया अरविंद मणेरकार हांणी पर्वरी पुलिशेंत कागाळ दाखल केल्ली.
ते प्रमाण पुलिसांनी दुबावीत आरोपी रुपा उर्फ श्रावणी उर्फ पुजा नायक (रा. पोरणें गोंय) अजीत शशिकांत सतरकार आनी अनिशा सतरकार (रा. पिसगाळ, प्रियोळ- फोंडें) ह्या तिगां आड भारतीय दंड संहितेच्या 420 आनी 34 कलमा खाला गुन्यांव दाखल केल्लो.
20 नोव्हेंबर 2021 ते 12 डिसेंबर 2021 ह्या काळांत हो फटवणुकीचो प्रकार घडिल्लो. कागाळदार प्रिया मणेरकार हिका वयल्या दुबावितांनी सरकारी नोकरी मेळोवन दिवपाचें हांयस दाखयिल्लें. हे खातीर दुबावितांनी तिचे कडल्यान 4 लाख रुपया घेतिल्ले. ही रक्कम कागाळदारान दुबावीत आरोपी अजीत सतरकार हाच्या बँक खात्यांत जमा केल्ली.
ह्या प्रकरणाचो फुडलो तापस पुलीस निरिक्षक राहूल परब हांच्या मार्गदर्शन खाला उपनिरिक्षक मयूर सावंत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
