भांगरभूंय | प्रतिनिधी
11.35 कोटींचें चलन जारी
पणजी: येरादारी खात्यान सुरू केल्ल्या एआय स्मार्ट सिग्नल यंत्रणा आनी सीसीटीव्ही कॅमेरा वरवीं एक लाख चलन दिवपाचो टप्पो हुपला. मेळिल्ले म्हायती प्रमाण हे यंत्रणे वरवीं 1 जून 2023 ते 31 ऑक्टोबर 2024 ह्या काळांत 1.25 लाख परस चड चलन जारी केल्यात. हे वरवीं 11.35 कोटी रुपयांचें चलन जारी केलां. गोंयांत सद्या ह्यो यंत्रणा धा सुवातांनी कार्यरत आसात.
यंत्रणे वरवीं सगल्यांत चड 51 हजार 270 चलन ट्रॅफीक हे गती मर्यादेचें उल्लंघन केल्ले खातीर दिल्यात. उपरांत येरादारी नेम कायद्याच्या कलम 119 प्रमाण येरादारीचे विवीध नेम मोडिल्ले खातीर 45 हजार 708 चलन दिलां. तशेंच विमो नाशिल्लें वाहन चलयिल्ले खातीर 8768, हॅल्मॅट घालिनासतना दुचाकी चलयिल्ले खातीर 7901, वाहन कर भरिल्ल्याचो पुरावो दाखोवंक नाशिल्ले खातीर 6590 चलन दिलां.
हाचे पयलीं गोंयांत 8 कोटी रुपया खर्च करून 10 सुवातांनी एआय आनी सीसीटीव्ही यंत्रणा बसयिल्ली. हातूंत बांबोळी जंक्शन, पणजे फेरी जंक्शन, कस्टम हावस जंक्शन, कला अकादमी जंक्शन, करंझाळे जंक्शन, मालीम जंक्शन, चिंबल जंक्शन, विद्यापीठ वाठार हांचो आस्पाव आसा. तशेंच पर्वरे येरादारीची गर्दी चड आशिल्ल्या ओ कोकेरो आनी तीन बिल्डींग जंक्शनार लेगीत अशी यंत्रणा बसयल्या.
मेळिल्ले म्हायती प्रमाण आतां मेरेन गोंय विद्यापिठा कुशीच्या कॅमेरांतल्यान सगल्यांत चड चलन जारी केलां. उपरांत पर्वरे तीन बिल्डींग, ओ कोकेरो, करंझाळे हांगासरल्या कॅमेरांतल्यान चलन जारी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
