भांगरभूंय | प्रतिनिधी
शेतकारांची मागणीः म्हापशें पालिके वतीन पळोवणी
भांगरभूंय । प्रतिनिधी
म्हापशें: कामरखाजन- म्हापश्यां रिवसेज प्रकल्पा लागसारच्या खाजन शेत जमनीर बेकायदो मातयेचो भराव घालून उबारिल्लीं बेकायदो बांदकामां मोडचीं आनी ही जमीन आदले वरी करची, अशी मागणी कामरखाजनाचो बांद टेनंट असोसिएशन आनी शेतकार वर्गान केल्या.
असोसिएशनाचे कागाळेच्या आदारान बुधवारा 6 नोव्हेंबराक म्हापशें पालिकेन ते सुवातेची दुसरे खेपे पळोवणी केली. पालिका कनिश्ट अभियंता मंथन कासकार, पालिका निरिक्षक शेखर गांवस आनी पर्यवेक्षक साईनाथ धारगळकार ह्या पंगडान ही पळोवणी केली.
टेनंट असोसिएशनाचे जॉन लोबो हांणी सांगलें, कामरखाजन वाठारांतल्या सखल भागांतल्या हे शेतजमनींत कांय जाणांनी मुद्दाम मातयेचो भराव घालून बेकायदो बांदकामां उबारल्यांत आनी तातूंत बेकायदो वेवसाय सुरू केला. खाजन वाठारांत बांदकाम करपाक परवानगी मेळना. तरी लेगीत एका लोकप्रतिनिधी सयत कांय जाणांनी थंय बांदकामां केल्यांत. ते खातीर पावसाळ्यांत उदक व्हांवून वचना. ह्या प्रकरणांत आमी वेळावेलार संबंदीत यंत्रणे कडेन कागाळी केल्यात.
बेकायदो बांदकामां खातीर कागाळी करपाक स्वताच्या बोल्सांतले पयशे खर्च करचे पडटात. उरफाटे बेकायदो प्रकार करपी आपलीं बांदकामां भाड्याक दिवन बिनधास्त आसतात. वट्ट 8 ते 10 बांदकामां थंय आसात. तातूंतल्या सात जाणांक पालिकेन नोटिसो धाडल्यात. सरकारान हे मुखार भलायकी कायद्या खाला कोणाकूच सरसकट नळाचें आनी विजेचें कनेक्शन दिवचें न्हय, अशी लोबो हांणी मागणी केली. शेतकार उषा आब्रियो हांणी सांगलें, खाजन शेतां फुडले पिळग्यां खातीर सांबाळून दवरपाक जाय. कांय जाणांनी आमच्या शेतांत अतिक्रमण करून बांदकामां केल्यात. तातूंत वॉशींग सेंटर आनी हेर वेवसाय सुरू केल्यात. हेच लोक आमकां धमकायतात. न्यायालयान म्हामार्गा कुशीक अतिक्रमणां केल्ल्या बांदकामांचेर कारवाय करपाचे निर्देश दिल्यात. ताची कार्यवाय हे सुवातेर सरकारी यंत्रणांनी करची, अशी मागणी तांणी तशेंच हेरांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
