भांगरभूंय | प्रतिनिधी
अरिफा सय्यदः देशाची अस्मिताय तिगोवन दवरप दरेकल्याची लागणूक
भांगरभूंय । प्रतिनिधी
वाळपयः देशाची अस्मिताय आनी अखंडताय तिगोवन दवरप ही दरेकल्याची लागणूक आसा. आयज देश सगळ्याच मळांचेर उदरगत करतना दिसता. अश्या वेळार सगळ्यांनी सरकारा फाटल्यान उबे रावून दरेकल्यान देशा विशीं अभिमान बाळगुपाची गरज आसा. राष्ट्रीय सेवा शिबिरांतल्या अणभवांचो फायदो दिसपट्टे जिणेंत करात, अशें सांखळी कारापूरच्या ज्ञानज्योती माध्यमीक विद्यालयाची मुख्याध्यापक अरिफा सय्यद हांणी सांगलें.
वाळपयच्या सरकारी उच्च माध्यमीक विद्यालया वतीन ज्ञानज्योती माध्यमीक विद्यालयांत राष्ट्रीय सेवा शिबाराचें आयोजन केल्लें. ह्या शिबिराच्या उक्तावण सुवाळ्यांत सय्यद उलयताली. ह्या वेळार माचयेर सत्तरी आनी दिवचल खेळां आनी युवा वेव्हार खात्याचे अधिकारी दिलीप गांवकार, शिक्षक रतीब गांवस, पालक शिक्षक संघाचे अध्यक्ष सतीश गांवकार हाजीर आशिल्ले. दिवली पेटोवन शिबिराचें उक्तावण जालें.
देशाचो सगळो भार तरणाट्यांच्या भुजार आसा. फुडारांत देशाची सर्वांगी उदरगत तरणाट्यांचेर निंबून आसा. तरणाट्यांनी देशभक्ती आनी राष्ट्रभक्ती ह्या विचारांच्या माध्यमांतल्यानूच देशाची सेवा करप काळाची गरज आसा, अशें सय्यद हांणी सांगलें.
राष्ट्रीय सेवा सारक्या शिबिरांतल्यान भुरग्यां मदीं समाजीक वावर करपाची आवड निर्माण जाता. एकामेकांक समजून घेवचे विचार निर्माण जातात. शाळेंत शिक्षणीक उपक्रमांच्या माध्यमांतल्यान आमी एके वेगळे दिशेन वावुरतात. मात अशीं शिबिरां अणभवां खातीर खुबूच म्हत्वाची थारतात. शिबिरांतलो अणभव आपले दिसपट्टे जिणेंत खुबूच मोलाचो थारतलो, अशेंय सय्यद हांणी सांगलें.
दिलीप गांवकार हांणी सांगलें, विद्यार्थ्यांनी सेगीत आपली मोख थारावपाची गरज आसा. सकारात्मक तरेन विचार करात. नकारत्मकते कडेन आडनदर करात. समाजांत मेळपी दरेके गजालींतल्यान खूबश्यो गजाली शिकपा सारक्यो आसतात. तातूंतल्या बरे अणभव घेवपाची गरज आसा. समाजांत वावुरतना ते अणभव खूब म्हत्वाचे थारतात.
सतीश गांवकार हांणी सांगलें, आपल्या वावरांतल्यान वायट व्यसनां आड जनजाग-ताय करची. समाजाक जागरूक करचे.
शिबिराची मुखेली शिक्षिका समिरा गांवस हांणी शिबीर आयोजीत करपा फाटलो उद्देश स्पश्ट केलो. शिबिरांत घेवपा आशिल्ल्या वेगवेगळ्या उपक्रमांची तांणी ह्या वेळार खोलायेन म्हायती दिली.
विद्यालयाचे शिक्षक रतीब गांवस हांणी येवकार दिलो. विद्यार्थिनी अनिशा नायक हांणी सुत्रसंचालन केलें जाल्यार रेणुका गांवस हांणी उपकार मानले. ह्या वेळार सरकारी उच्च माध्यमीक विद्यालयाचे शिक्षक डॉ. स्नेहल नाडकर्णी, नितेश बांदेकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
