भांगरभूंय | प्रतिनिधी
वॉशिंग्टन, खबरां संस्था ः अमेरिकेंतलें अध्यक्षीय वेंचणुकेंची फाटलो म्हयनोभर चर्चा चालू आशिल्ली. भारतीय वेळा प्रमाण मंगळारा सांजवेळा अमेरिकेंत मतदान सुरू जालें. बुधवारा सकाळीं मतांची मेजणी सुरू जाली आनी दनपारां 1 वरांचे सुमाराक निकाल जाहीर जालो. अमेरिकेंत रिपब्लिकन पक्षाक भोवमत मेळ्ळां. डोनाल्ड ट्रम्प परतून एक फावट अमेरिकेचें अध्यक्ष म्हणून निवडून आयले. 277 इलेक्टोरल मतां मेळोवन डोनाल्ड ट्रम्प नवे अध्यक्ष जाले. जाल्यार कमला हॅरिस हांकां 226 इलेक्टोरल मतां मेळून हार घेवची पडली.
मजगतीं, सिनेट आनी संसदेंत रिपब्लिकन पक्षाक भोवमत मेळ्ळां. ही झूज अमेरिकेंतल्या फाटल्या 25 वर्सांतली सगळ्यांत म्हत्वाची झूज मानतात. वेंचणुक जिखले उपरांत ट्रम्प हांणी अमेरिकेंतल्या लोकांचे उपकार मानले. ‘लोकांक अशक्य दिसतालें तें आमी केलें. अमेरिकेक परतून व्हड करून देशाचे सगळे प्रस्न सोडयतले आनी देशाची उदरगत करतलें अशें ट्रम्प हांणी सांगलें. अमेरीकन लोकांच्या कुटुंबा खातीर आनी तांच्या फुडारा खातीर हांव लडतलों. फुडली 4 वर्सां अमेरिके खातीर म्हत्वाचीं आसतलीं अशें ट्रम्प हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
