भांगरभूंय | प्रतिनिधी
नवी दिल्ली, खबरां संस्था ः थायलंडान भारतीय नागरिकां खातीर व्हिसा फ्री एंट्री धोरणाची अनिश्चित काळा खातीर मुजत वाडोवपाची घोशणा केल्या. ही येवजण 11 नोव्हेंबर 2024 दिसा सोंपपाची आशिल्ली. ह्या धोरणा प्रमाण भारतीय पर्यटकांक 30 दीस थायलंडांत व्हिसा फ्री रावपाक मेळटा. भारतीय प्रवाशांक 60 दिसां मेरेन व्हिसा नासतना थायलंडांत प्रवेश मेळटा. तशेंच, तांकां चड वेळ रावपाक जाय जाल्यार इमिग्रेशन ऑफिसांत ती मुजत आनीक 30 दीस वाडोवंक शकतात.
पर्यटन उद्देगाक चालना मेळ्ळी…
व्हिसा फ्री एंट्री वरवीं प्रवाशांची प्रवेश प्रक्रिया सोंपी जाता, जाका लागून त्या देशांतल्या प्रवाशांचो आंकडो वाडटा. प्रवाशांची वाड जायत आसतना जेवण, भोंवडी आनी थळावी येरादारी अशा पर्यटन संबंदीत सेवांची मागणी वाडटा. हाका लागून नोकऱ्यो निर्माण जातात आनी अर्थवेवस्था घटमूट जाता.
आपली अर्थवेवस्था वाडोवपा खातीर थायलंडान 10 नोव्हेंबर 2023 दिसा भारता खातीर व्हिसा फ्री एंट्रीची घोशणा केल्ली. थायलंड सरकाराचे प्रवक्ते चाय वॉचरोंके हांणी सांगलें, हे येवजणेक लागून 1.4 दशलक्ष पर्यटक येतले. हाका लागून 1.5 अब्ज डॉलर म्हळ्यार सुमार 12 हजार कोटी रुपया अतिरिक्त येणावळ मेळटली.
परदेशांत प्रवास करपी भारतीयांचो आंकडो 2.1 कोटी…
भारत सरकाराच्या आंकडेवारी प्रमाण 2011 वर्सा परदेशांत वचपी भारतीयांचो आंकडो 14 दशलक्ष आशिल्लो तो 2019 वर्सा 27 दशलक्ष जालो. ते उपरांत कोरोना म्हामारीक लागून पर्यटन मळार लुकसाण जाले. पूण 2022 वर्सा हो आंकडो परतून 2.1 कोटी जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
