भांगरभूंय | प्रतिनिधी
नवी दिल्ली, खबरां संस्था ः भारतीय ऑलिंपिक संघटणेन 2036 वर्सा ऑलिंपिक आनी पॅरालिंपिक खेळ आयोजीत करपाची इत्सा उक्तायल्या. हे फाटभुंयेर भारतान 2036 वर्सा ऑलिंपिक खेळांचे आयोजन करपाचें थारोवन आंतरराष्ट्रीय ऑलिंपिक समिती म्हळ्यार आयओसी (International Olympic Committee) पत्र धाडलां.
खेळां मंत्रालयांतल्या सुत्रांनी दिल्ले म्हायती प्रमाण हें पत्र 1 ऑक्टोबराक धाडिल्लें. मजगतीं, प्रधानमंत्री नरेंद्र मोदी हांणी 2036 वर्साचे ऑलिंपिक सर्तीचे यजमानपद सांबाळपाची इत्सा उक्तायिल्ली. हांतूत भारता वांगडा सावदी अरेबिया, कतार आनी तुर्कस्तान देश आसात.
मजगतीं, ही सर्त भारतांत जावची अशी इत्सा आयओसीचे मुखेली थॉमस बाक हांणी उक्तायल्या. 2036 वर्साच्या ऑलिंपिक सर्तीचे यजमानपद भारताक मेळ्ळें जाल्यार ही सर्त अहमदाबादांत जातली अशें म्हणटात.
आयओएची अध्यक्ष पी टी उषा हांच्या फुडारपणा खाला पॅरिस ऑलिंपिकांत भारतीय खेळगड्यानी वांटो घेतिल्लो. भारताक यजमानपद मेळ्ळ्यार योग, खो- खो, कबड्डी ह्या देशी खेळांचो आस्पाव करपाचेर भर दितले. भारतीय खेळां प्राधिकरणाच्या मिशन ऑलिंपिक सेलान (एमओसी) नवे खेळां मंत्री मनसुख मंडविया हांकां ऑलिंपिक खेळां खातीर जाय आशिल्ल्या उपायांचेर सविस्तर अहवाल सादर केला.
भारता वांगडाच इजिप्त, इंग्लंड, इंडोनेशिया आनी कतार ह्या देशांनीय 2036 वर्साच्या खेळांचे आयोजन करपाची इत्सा उक्तायल्या. यजमानपदा खातीर 10 संभाव्य देशां कडेन उलोवणी करतात अशें ऑलिंपिक अधिकाऱ्यांनी ऑक्टोबरांत स्पश्ट केलें. ऑलिम्पिक अधिकाऱ्यांच्या फुडारपणा खाला यजमानपद खंयच्या देशाक दिवपाचो हाचे अधिकार दिवपाची प्रक्रिया गुपीत आसता. मजगतीं, 2016 वर्साच्या खेळां खातीर रिओ दी जानेरोन बोली जिखिल्ली जाल्यार 2020 वर्साच्या खेळां खातीर टोकियोची निवड जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
