भांगरभूंय | प्रतिनिधी
जबलपूर, खबरां संस्था ः खून जाले उपरांत तो कसो जालो? कोणे केलो? कित्याक केलो ह्या सगळ्या प्रस्नांचो जापो पुलीस सोदतात. आतां मुसांचे मजतीन पुलिसांनी एका खून प्रकरणाचो सोद लायलो. 26 वर्सां पिरायेच्या काकाच्या खुनाच्या प्रकरणांत 19 वर्सां पिरायेच्या तरणाट्याक पुलिसांनी अटक केल्या.
मध्य प्रदेशांतल्या जबलपूरांतली ही घडणूक. ३० ऑक्टोबराच्या सांजवेळार मनोज ठाकुर आपल्या पुतणया वांगडा म्हळ्यार धरमसिंह हाचे वांगडा पिवपाक गेलो. दिवाळेचो आदलो दीस आशिल्ल्यान तांणी सोरो आनी जेवण पार्सल घेतलें. ते उपरांत मनोज घरा परतलो ना, धरमसिंह एकलोच घरा आयलो. उपरांत ताच्या कुटुंबान मनोज बेपत्ता जाल्ल्याची कागाळ पुलिशेंत केली. बेपत्ता मनोजचो सोद पुलिसांनी सुरू केल्लो. दुसऱ्या दिसा 31 ऑक्टोबराक पुलिसांक मनोजाची कूड शारा भायर शेतांत मेळ्ळी. पुलिसांनी चवकशी सुरू केली.
मनोज हाच्या मरणा उपरांत जायतीं कारणां आशिल्लीं, जाका लागून धरम सिंगाची चवकशी करपाचें थारायलें. ह्या प्रकरणांत मनोजाचो पुतणयो धरमसिंह हो मुखेल दुबावीत आशिल्लो. मनोज आनी धरमसिंह दोगूय एकठांय भायर गेल्ले पूण येतना धरमसिंह एकलोच आयल्लो हें पुलिसांक कळ्ळें. उपरांत पुलिसांनी आनीक एक फावट चवकशी करपाचें थारायलें. पुलिसांनी दुसरे खेपे धरमसिंगाक आपयलो. तातूंत एक गजाल पुलिसांच्या लक्षांत आयली. ती म्हळ्यार धर्मसिंगाच्या तकले भोंवतणीं मुस भोंवताले. तांणी जायते फावट तांकां धांवडवपाचो यत्न केलो. पूण ती ताचे भोंवतणीं फिरताली.
ते मूस धर्मसिंह सोडून हेर कोणाच्या फाटल्यान वचनात हें पुलिसांक निरिक्षणांतल्यान कळ्ळें. तेन्ना जबलपूरचो पुलीस अधिकारी अभिषेक पायासी हाका दुबाव आयलो आनी ताणें धरमसिंगाक आपलो शर्ट काडून तपासणे खातीर दिवपाक सांगलें. उपरांत तो शर्ट फॉरेंसिकांत धाडलो. ताचेर रगताचे दाग आशिल्ल्याचें कळ्ळें. रक्ताच्या वासाक लागून मूस ताचे भोंवतणीं फिरताले. पूण ते मनशांक दिसनाशिल्ले. उपरांत परत एक फावट खोलायेन चवकशी करतना धरमसिंगान काका मनोज हांचो खून आपूणूच केलो हें मान्य केलें. ताणें सांगलें, पियेलें उपरांत आमचे मदीं वाद जालो. ते उपरांत हो वाद वाडत गेलो. धरमसिंहाच्या मतान काका मनोज ठाकुरान ताका पयलीं मारलो. उपरांत हांवें ताका जड बडयेन मारलो आनी तातूंत तो गंभीर जखमी जालो आनी ताका मरण आयलें. ही कबुली दिल्या उपरांत पुलिसांनी धरमसिंग हाका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
