भांगरभूंय | प्रतिनिधी
रील कल्चर मात्शी थीर जावपाची हांव वाट पळयता. बरेच तरणाटे मोलादीक वेळ सोशल मिडीया ‘स्क्रोल’ करून वगडायतात.
म्हज्या जिवीताची फाटल्या कांय वर्सांची पानां परतलीं जाल्यार म्हजें जायते आवडीचे खासा गोंयकार गायक मेळटले, कोंकणी गीत बरोवपी कवी, गोड आवाजांत तें सादर करपी गायक. वर्सां वतात तशीं नवी गीतां, नवें गायक आवडूंक लागतात. मनशाचो सभावीक गूण तो. म्हजे लेगीत तशेंच, पूण म्हज्या भुतकाळाच्या पुस्तकाचें एक पान जर हांवे परत एकदां नियाळ्ळें जाल्यार म्हाका 2015 वा 2016 वर्सांचो काळ याद जाता, जेन्ना हांव म्हज्या गांवांत सुटयेचे दीस मनोवपाक गेल्लों. तेन्ना रॅप संगीत फामाद आशिल्लें. तातूंत गोंयचो नामनेचो रॅपर जाका आमी ‘वेकिंग ग्रंट’ ह्या नांवान वळखतात, ताचे व्हिडीयो हांवें युट्यूबार पळयिल्ले. तातूंत चडशें समाजीक प्रस्न, वास्तव जिणेचो संघर्श आस्पावता, म्हणून म्हाका ताची रॅप स्टायल आवडटाली. हांव ताचो फॅन जाल्लो, अशेंय म्हणू येत.
फॅनाच्या मनांत सदांच एक इत्सा आसता, आपल्या सेलिब्रिटीक मेळपाची. घडये हें त्या वेळार म्हज्या नशिबांत बरयिल्ले. सुटी मनोवपाक गेल्लो हांव, गांवांतली क्रिकेट सर्त पळोवपाक गेल्ले कडेन म्हज्या सेलिब्रीटीक मेळ्ळो. आपलो सेलिब्रीटी दोळ्यां मुखार दिसले उपरांत काळीज वयर सकयल जाताच, हांवें जाप केली आनी ताणें म्हाका टाळ्ळो जाल्यार… शेवटाक धाडस करून गेलोंच. सर, तुमचे बरोबर एक फोटो काडूंक जाय करीत हांवें आनी म्हज्या चुलत भावान एक- एक फोटो काडलो. त्या खिणाची उमेद मोबायला भितर कॅप्चर करून दवरली, घडये म्हज्या सेलिब्रीटीक हाचो उगडासय नासत. उपरांत मनांत गुस्पागोंदळ करपी प्रस्न भावा मुखार मांडलो, ‘वेकिंग ग्रंट हांगां कितें करता?.’ भावान सहजपणान म्हणलें, ‘ह्याच गांवचो तो. हांगां न्हय जाल्यार खंय आसतलो?’ हांवेंय म्हज्या भितरल्या दुबावाक गांठ मारून क्रिकेटीचो आस्वाद घेतलो. धावत्या वर्सां बरोबर वेकिंग ग्रंटाची नवींत रॅप गीतांय प्रसिद्ध जावपाक लागलीं.
म्हणटात न्हय ‘किसमत मिला ही देती है’. म्हजे बाबतींत अशेंच घडले. एक फॅन आनी सेलिब्रीटी मदीं लागींची वळख घडली ती एकाच कचेरेंत काम करतना. म्हजे खातीर म्हण वा म्हज्या सारकिल्ले कितलेंशेच जाणांचो आवडटो सेलिब्रीटी आशिल्ल्या रॅपराच्या करियराची सुरवात कशी जाल्या आसतली काय, एका कलाकाराक सध्याच्या काळांत आपली वळख सांबाळून दवरप खूब कठीण आसता. हांव तर म्हज्या सेलिब्रीटी बरोबर हांसता, खेळटा. मनांत आशिल्ले प्रस्न ताका विचारलें. ताणेंय हय ना करीनासतना ल्हानशी मुलाखतय दिली. एक रॅपर म्हणून ताची वाटचाल तुमचे मुखार दवरतां.
खूबश्या कलाकारांची करियराची सुरवात थारावन जाता, पूण वेकिंग ग्रंटच्या बाबतींत ती मात्शीं वेगळी आसली. “It was Just an Accident” अर्थांत, जिवितांत संगीतांत कितें तरी करपाची इत्सा आशिल्ली. पूण, अर्थीक परिस्थितीक लागून ताणें ताच्या कामाच्या उत्पन्नांतल्यान विसाव्या वर्सा संगीत शिकपाक सुरवात केली. घरांत एकटोच आशिल्ल्यान आनी वेळ धांवता तें पळोवन तांणे इश्टाच्या सायबरेज स्कीम लॅपटॉपाचेर YouTube free hip-hop instrumental beat चेर कोंकणींत थोड्यो ओळी रेकॉर्ड केल्यो. आपल्या इश्टाक आयकूपा खातीर ताणें ऑडियो धाडिल्लो. ताच्या इश्टान तो हेरांक धाडलो आनी हेरांनी चड लोकांक धाडलो. थोडे जाण ह्या ट्रॅकाचे व्हिडियो मागपाक लागले. ‘म्हाका जें करपाची विनवणी केल्ली तें हांवें केलें’. लोकांनी म्हाका रॅपर केलो आनी हांवें तें मान्य केलें, अशें ताणें सांगलें.
म्हजे प्रस्न खूब आशिल्ले, पूण ते विचारले बगर ताची जाप मेळना न्हय, मागीर हांवें कित्याक संद सोडची? हांवेंय काडले म्हजे प्रस्नांचे बाण. प्रस्न दुसरो, रॅपर म्हूण तुमच्या प्रवासाचे सुरवेक यशस्वी जावपाची कल्पना केल्ली? हाचेर जाप दितना ताणें सांगलें, ‘हांवें केन्नाच कांयच अपेक्षा करूंक नाशिल्ली. म्हज्या इश्टांक म्हजे कडल्यान खूब अपेक्षा आशिल्ली. म्युझिक व्हिडियो तयार करपाक म्हजे विसंगतीक लागून तांची आस्त उणी जाल्या अशें केन्ना- केन्ना म्हाका दिसता, तें बदलून तांकां सगळ्यांक म्हजो बेगीन अभिमान दिसचो अशी इत्सा आसा. जियेता मेरेन व्हडपणाचे यत्न करचे पडटले असो हो समज हांव जियेतां’ ताच्या इश्टान ताचेर दाखयल्ल्या विस्वासाक खरेंच तोखणायेचो पावसान भिजोवप चुकीचें थारचें ना.’
संगीत जायत्या तरांचे आसता. मागीर आपूण खंयचें संगीत क्षेत्र आपणावप आनी तातूंत फुडें वचप हें कलाकाराचेर आसता. तुमी सुरवेक रॅप हो तुमकां टायम पास आशिल्लो अशें म्हणलें. जाल्यार तुमी फकत हिप-हॉप कित्याक वेंचलो, हेर खंयचोय संगीत प्रकार कित्याक ना? हो म्हजो फुडलो प्रस्न आशिल्लो. ‘हांवें हिप-हॉप वेंचून काडूंक ना. हांव तसो गिटारय वाजयता आनी पॉप वा रॉकांत वेगवेगळ्या भावनीक विशयांचेर गितांय रचतां आनी गायतांय बी. पूण रॅपा वरवीं हांव मतां चड बरी व्यक्त करूंक शकता. हांव म्हजो संदेश गीतांत चड बरो पावोवंक शकता आनी रॅपा वरवीं म्हाका रिबेल अशें दिसता.’ ही ताची जाप सरळ आशिल्ली.
प्रत्येक कलाकाराच्या जिणेंत कठीण अवस्था येता तिका कलाकार कसो तोंड दिवन भायर सरता हें कलाकारचे पासियेंसाचेर आदारून आसता. वेकिंग ग्रंटच्या जिवीतांत लेगीत हो काळ आयला. तांणी ताका कशें तोंड दिला आसतले काय, हो प्रस्न म्हाकाय पडलो. पूण ताची जाप मात अशी आशिल्ली. ‘म्हजो सद्याचो काळ कठीण आसा. तेन्ना म्हाका फकत वेळूच वेळ आशिल्लो. आतां, म्हजे लागीं साधनसुविधा आसात, पूण वेळ ना. लोकांची हळशीक कंटेटा खातीर तोखणाय जाता, अशें म्हाका दिसता. हांव जीईसी, फोंड्यां मायनिंग इंजिनियरिंगांत बीईचें शिक्षण घेतां. कॉलेज सोंपतकच सांजवेळ ते रात मेरेन न्यूज अँड एंटरटेनमेंट फर्मांत पुराय वेळ काम करतां. मन शांत कशें दवरप ही म्हजी समस्या. झूज कठीण आसा आनी मानसीक नदरेन म्हज्या आकांक्षांचेर लक्ष केंद्रीत करपा खातीर हांव मैलाचे मैल चलपाक तयार आसां.’ हे जापेन जरी म्हज्या अंतरमनाक हालयलें तरीय म्हजे भितरल्या जिद्दीच्या दिव्याक तेल घालून परतून पेटोवपाच्या मळार हाडून सोडलो.
कलाकार जिणेंत जायते फावटी जिखता, हरता, हारून परत उठपाचो यत्न करता, पूण हाचे खातीर आत्मविस्वास बाळगप म्हत्वाचो. तुमी तयार केल्ल्या सगळ्या गितां मदीं, तुमकां स्वता कडेन संबंदीत करपाक मेळपी तुमचें आवडीचे गीत खंयचें? आनी कशें? हो प्रस्न जरी आयकपाक सोंपो दिसत तरीय ताची जाप देख घेवपा सारकी आसा, ‘म्हजी चडशीं सगळींच गितां कडेन म्हज्या जिविताचे अणभवांचे संदर्भ आशिल्ल्यान ह्या प्रस्नाची जाप दिवप कठीण. एक ट्रॅक वेंचून काडपाक सांगल्यार ‘हाव जिखतलो’ हो एक ट्रॅक हांवें जिवीत कठीण जाता तेन्ना स्वताक प्रेरणा दिवपा खातीर तयार केल्लो अशें म्हणचें पडटलें. हो फातोड्डेंच्या स्क्वीशी स्टोन हांणी तयार केल्लो. कलाकाराक सदांच अर्थीक आनी नैतीक नदरेन कश्ट सोसचे पडटा जायत्या फावटी आपली घरचीं तेंको दिताय बी आनी नाय बी, पूण कलाकारच्या कठीण परिस्थितीन ताचो आदाराचो खांबो कोण आनी कसो थारता हें मात म्हत्वाचें, वेकिंग ग्रंट च्या जिवितान अर्थीक आनी नैतीक नदरेन फकत एक व्यक्तीचो आस्पाव ना म्हणून तो फकत एकेच व्यक्तीचें नांव घेवंक शकना.
‘हांव सदांच म्हणटां, संवसार दयाळ काळजाच्या आत्म्यांनी भरिल्लो आसा. तुमचें काळीज ओतपाचो हेतू आसल्यार जायते जाण तुमकां पांखां दिवपाक येतात. फकत सगळ्यांचो उपकार मानपाक सोदतां. तांचो आदार नाशिल्लो जाल्यार आयज मेरेन म्हज्यो कल्पना फकत कल्पनाच उरता आसल्यो. म्हजो संगीत प्रवास चालू दवरपा खातीर, तो दृश्यांनी दाखोवपा खातीर सगळ्यांचे उपकार.’ हे जापेंत जरी म्हज्या सेलिब्रीटीन कोणाचें नांव घेवंक नासलें, पूण हाचे वयल्यान तो फकत एकट्याचें नांव घेवन हेर कोणाकूच दुखोवपाचो यत्न करीना अशें दिसून येता.
भुतकाळ, वर्तमान काळ आनी भविश्य काळ दरेकाच्या जिणेचो भाग, एक कलाकार भुतकाळांत कितें आशिल्लो, वर्तमानान तो कितें करता आनी भविश्यांत तो कितें करतलो हाची समज कोणाकूच ना, आपली कला जितली बरी सादर करूंक पावता शेवटाक तोच कलाकार तिगता हें म्हजें मत. पूण ह्या प्रस्नाची जाप म्हज्या सेलिब्रीटीची वेगळी आशिल्ली. नवे पिळगेन आयकपा सारकी.
‘म्हजो संदेश सादो आसा. ‘Hang in there’. तुमकां स्टार करपाक मसिया येवचो ना. येता त्या 10 वर्सांनी तू खंय आसतलो हाची जाणीव कोणाक नासता. पूण फाल्यां कितें करपाचें तें तुमकां नक्कीच खबर आसा. दर दिसा तें पावल संगीताचे दिशेन व्हरात आनी तुमचो प्रवास तुमी सपनांत पळयिल्ल्या सारकोच आसतलो.’
आपूण फाल्यां कितें करतलों हाची जाणीव आमकां आसून लेगीत आमी आळशी जाल्यात काय, हो प्रस्न ह्या वेळार म्हाका पडलो. फाटले कांय म्हयने जाले, आमी वेकिंग ग्रंटच्या युटूब चॅनलांत नवीन रॅप गीत आयकूंक ना. रॅप आयकपाक कितलो वेळ वाट पळोवची पडटली काय? हो म्हजो निमणो प्रस्न जरी आशिल्लो तरीय ताच्या जापींत म्हज्या भितरले जायते नवीन प्रस्न निर्माण जाले. ‘नवीन रॅप फाल्यां जावंक शकता वा 5 वर्सां उपरांत जावंक शकता, हांव तुमकां फकत इतली खात्री दितां ‘वेकिंग ग्रंट तुमचो, तुमकां आनीक संगीत जाय जाल्यार हांव बेगीनूच दितलों’. रील कल्चर मात्शी थीर जावपाची हांव वाट पळयता. बरेच तरणाटे मोलादीक वेळ सोशल मिडीया ‘स्क्रोल’ करून वगडायतात.
ह्या निमण्या वाक्यांत वर्तमानांत जें कितें सत्य चलता हाची जाणीव करून दिली, हांगा जरी हो लेख सोंपयता, पूण नवीन विचार, सत्य घडणुको आनी मनांत आशिल्ले जायते प्रस्न घेवन म्हजो लेखनाचो थांबिल्लो प्रवास हांव परतून सुरु करतां… आनी शेवटाक इतलेंच सांगता अमित नायक (वेकिंग ग्रंट) बेगीनूच तुमचे मुखार नवें रॅप घेवन येतलो. तो मेरेन वाट पळयात.
विष्णू नार्वेकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
