भांगरभूंय | प्रतिनिधी
पणजी: फाटलीं तीन वर्सां बंद आशिल्ली डीडी कोसंबी विचार व्याख्यानमाळ परतून एकदां सुरू जातली. हे विशीं कला आनी संस्कृती खात्याच्यो बसका सुरू जाल्यात. हो महोत्सव फेब्रुवारी 2025 वर्सा जावपाची शक्यताय आसा. अंदुंच्या महोत्सवांत क्रिकेट खेळगडो कपील देव तशेंच गौर गोपाळ दास हांचे सयत हेर मानेस्तांक आपोवपाचो विचार सुरू आसा. पूण तांचीं नांवां अजून निश्चीत जाल्लीं नात.
मेळिल्ले म्हायती प्रमाण 2022 च्या व्याख्यानमाळेंत व्याख्यात्यांच्या निवडी वेल्यान वाद जाल्लो. तेन्ना ही व्याख्यानमाळ रद्द केल्ली. उपरांत अजून ही व्याख्यानमाळ जाल्ली ना. अंदूं असो वाद उप्रासचो न्हय हे खातीर सरकारान 10 जाणांची निवड समिती स्थापन केल्या. मंत्री गोविंद गावडे हे समितीचे अध्यक्ष म्हूण काम पळयतात. जाल्यार विवीध मळा वेले मानेस्त वांगडी म्हूण काम पळयतात. समिती अंदुंच्या व्याख्यानमाळेंत योग्य व्याख्यातो वेंचतली.
फाटलीं कांय वर्सां डीडी कोसंबी व्याख्यानमाळ ही गोंयकारां सयत देशांतल्या हेर लोकां खातीर बौद्धीक खाद्य दिवपाचें काम करताली. पूण 2021 उपरांत ही व्याख्यानमाळ आयोजीत केल्ली ना. मेळिल्ले म्हायती प्रमाण 2022 वर्सा व्याख्यानमाळे खातीर वेंचिल्ल्या व्याख्यात्यां विशीं भाजपाच्या केंद्रीय फुडाऱ्यांनी अप्रत्यक्ष रितीन निरशेवणी उक्तायिल्ली. उपरांत खात्यान राज्यांतल्या शाळांच्यो परिक्षा आशिल्ल्याचें कारण दिवन पुराय व्याख्यानमाळूच रद्द केल्ली.
2022 चे व्याख्यानमाळेंत ज्ञानपीठ पुरस्कार जैतिवंत साहित्यीक दामोदर पावजो, दलीत लेखक डॉ. सूरज येंगडे, लेखिका माधवी मेनन आनी लेखक डॉ. देवदत्त पटनायक हे मानेस्त आपले विचार मांडपाचे आशिल्ले. शुल्लक कारण दिवन व्याख्यानमाळ रद्द केल्ल्यान सगले कडेन टिका जाली. त्या वेळार विरोधी विचार नाका अशीय टिका जाल्ली. 2022 उपरांत हो महोत्सव जालो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
