भांगरभूंय | प्रतिनिधी
काथो विकून खात्यान 1 लाखा परस चड जोडली येणावळ
पणजीः गोंय राज्यांत फाटल्या 10 म्हयन्यांत 9 हजारा परस चड काथो तयार जाला. तशेंच तयार केल्लो काथो विकून 1 लाखा परस चड येणावळ जोडल्या अशी म्हायती गोंय हस्तकला, कापड आनी काथो खात्यान दिल्या. खात्याच्या कारखान्यांत नाल्लांच्या सोण्णां पासून हो काथो तयार करतात.
खात्यान दिल्ले म्हायती प्रमाण डिसेंबर 2023 ते सप्टेंबर 2024 मेरेन 9481 कील इतलें काथ्याचें उत्पादन जालां. हो काथो शेंदरी, जाजम, सुतळी, सोफा तयार करपी आनी हस्तकला खात्याच्या प्रशिक्षण वर्गांक दितात. हो तयार केल्लो काथो विकून खात्याक 1 लाख 26 हजार रुपयांची येणावळ जाल्या.
कुंडय मानशेर खात्याचो डिफायबरींग प्लांट आसा. ह्या प्लांटाचेर नाल्लाचीं सोण्णां येतात आनी प्लांटांत ताची प्रक्रिया करून ताचो काथो तयार करतात. हीं सोण्णां सद्दां प्लांटाचेर येनात. सोण्णाचो स्टॉक सोंपलो की दुसरो स्टॉक आमी मागयतात, अशी म्हायती खात्याच्या अधिकाऱ्यान दिली.
दर ट्रिपीक 55 हजार कील सोण्णा कुंडयच्या प्लांटाचेर येतात. हाचे फाटल्यान सप्लायरांक खातें 17,600 रुपया फारीक करता. फक्त खात्याचो एकच सप्लायर माशेल गांवचो नागेश फडते प्लांटाचेर सोण्णां धाडटा. पयलीं खातें बागायतदारा कडल्यान सोण्णां विकतीं घेतालें. पूण बागायतदार मानाय आनी येरादारीचो खर्च दिवपाक तयार नासलें, सगलो खर्च खात्याचेर घालताले म्हूण बागायतदारा कडल्यान सोण्णां विकतीं घेवपाचें खात्यान बंद केलें.
बागायतदारा कडल्यान सेवा बंद केले उपरांत खात्याच्या प्लांटाक सोण्णां घालपा खातीर आमी निविदा काडली. ज्या मनशान सगल्यांत कमी बोली निविदेंत लायली ताकाच सोण्णां सप्लाय करपाचें कंत्राट दिलां. सद्दां एकलोच मनीस आमकां सोण्णां प्लांटांत सप्लाय करता अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
