भांगरभूंय | प्रतिनिधी
फोंडें, प्रतिनिधी ः सरकारी नोकरी मेळोवपाच्या हांयसाक लागून अर्थीक लुकसाण, फटवणुकांच्यो घडणुको घडत आसा. हे फाटभूंयेर मुख्यमंत्र्यान पुलीस प्रशासनाक पुराय तपास करपाचो आदेश दिल्लो. ह्याच प्रकारा कडेन संबंदीत आशिल्ली दीपश्री सावंत गांवस हिका दोन दिसां आदीं फोंडें पुलिसांनी ताब्यांत घेवन अटक केल्ली. आतां तिका न्यायालयान २ दिसांची पुलीस कोठी दिल्या.
मजगतीं, सोमारा सकाळीं दीपश्री बेळगांव सावन गोंयांत येता अशी म्हायती फोंडें पुलिसांक मेळिल्ली. ते प्रमाण मोलें तपासणी नाक्या वयल्यान गोंयांत प्रवेश केले उपरांत तिका ताब्यांत घेवन अटक केली. पुलिसांनी केल्ले चवकशेंत दीपश्री सावंत हिका दीपश्री गांवस आनी दीपश्री माहतो ह्या नांवानूय वळखतात, अशें कळ्ळें. सरकारी नोकरी दिवपाचें हांयस दाखोवन तिणें खूबश्या लोकां कडल्यान व्हड रक्कम एकठांय केल्ल्याचें चवकशेंत स्पश्ट जालें. ताका लागून तिचे कडल्यान आनीक व्हड गुपितां भायर सरपाची शक्यताय पुलिसांनी उक्तायल्या. फुडलो तपास सुरु आसा.
मजगतीं, सध्या राज्यांत भरती घोटाळ्यांचो आंकडो दिसान दीस वाडत आसा. देखून पयशे वगडावपी सगल्यांनी भियेनासतना पुलिशेंत कागाळ करची अशीं विनवणी मुख्यमंत्री डॉ. प्रमोद सावंत हांणी पत्रकार परिशदे वरवीं केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
