दिवचल तालुक्यातल्या पंचायतींक कोयर वेवस्थापनांत अपेस : मुख्यमंत्री तिडकले

भांगरभूंय | प्रतिनिधी

बेकायदेशीर घरांक वीज आनी उदकाचे दाखले मेळचे नात

दिवचल, प्रतिनिधी: कोयर वेवस्थापन आनी ताचो विलो लावपा खातीर गोंय सरकार वर्साक चारशें कोटी परस चड रुपया खर्च करता. अशें आसूनय पंचायत मंडळां, सचीव, संबदीत अधिकारी आनी लोक कोयराचेर विशीं जापसालदारकेन वागनात. ह्यान फुडें अशें चलचें ना. दरेके पंचायतीन, पंचायत मंडळ आनी सचिवांनी संबदीत अधिकार्‍यांनी त्या- त्या वाठारांत नेमान कोयर वेवस्थापन करप, नितळसाण दवरप अश्या गजालींचेर विशेश लक्ष दिवचें पडटलें. कोणाचेंच चुरचुरें करचे ना, अशी शिटकावणी मुख्यमंत्री डॉ. प्रमोद सावंत हांणी सांखळे दिली.
मुख्यमंत्री सावंत हांणी कोयर वेवस्थापनाचो नियाळ घेतना मंगळारा दिवचल म्हालांतल्यो सगळ्यो पंचायती तशेंच दोनूय पालिकांच्या वांगड्यांक आमंत्रीत केल्लें. ह्या वेळार बाराय म्हालांतले गटविकास अधिकारी, म्हालांतले पंचायत सचीव, सरपंच हजर आशिल्ले.
वोलो कोयर, सुको कोयर वेळार एकठांय करप, एमआरएफ शेड १००% उबारप, तशेंच रस्त्यार, न्हंयांनी, व्हाळांनी कोयर उडोवप्यांचेर ह्यान फुडें कारवाय करतले. दरेक गांव कोयर मुक्त करपाची जापसालदारकी पंचायत मंडळ, पालिकेची आनी सचिवाची आसतली. कोयर विशीं प्रस्न उप्रासल्यार ह्या तिगांकूय जापसालदार धरतले, अशें मुख्यमंत्र्यांनी म्हणलें.
सरकारी नोकर पगार घेतात. तांणी समाजीक जापसालदारकी समजून घेवन सेवा स्वरूपांत नितळसाणे खातीर विशेश योगदान दिवप गरजेचें. दरेक पंचायत मंडळ गांवांतले सगळे नागरीक, ग्रामस्थांनी हे विशीं सहकार्य दिवप गरजेचें अशें मुख्यमंत्र्यानी म्हणलें.
दरेके पंचायतीक विवीध मळार २९ तरेचो निधी दिता. दिवचल म्हालांतल्यो चडश्यो पंचायती कोयर वेवस्थापनांत अपेशी जाल्ल्याचें मत उक्तायतना मुख्यमंत्र्यांनी खर तिडक उक्तायली. तांणी खंत उक्तायतना जायत्या जाणांनी निधी वापरूंकच नाशिल्ल्याचें निदर्शनाक हाडून दिलें.

लोक कोयराचो कर भरिनात
जायते लोक कोयराचो कर भरिनात. ते विशींय कारवाय जावपाची आसा. जीं बेकायदेशीर घरां आसात तांकां ह्यान फुडें वीज आनी उदकाचे परवाने मेळचे नात. रस्त्यार नुस्तें, भाजी आनी हेर वस्तू विकप्यांचेर बंदी हाडून तांकां बाजारांत सुवात दिवपाक जाय, अशी गरजूय तांणी उक्तायली.
दर आठ दिसांनी कोयर वेवस्थापनाचो नियाळ घेवपाचे आदेश अधिकार्‍यांक मुख्यमंत्र्यांनी दिल्यात. कोयर वेवस्थापनान कंत्राट नेमूक ना. थंय सरकार तें नेमतलें. दरेके पंचायतींत शेड उबारतले. फकत सुंदर गोंय नितळ गोंय म्हणून चलना. प्रत्यक्षांत पर्यटन थळां आशिल्ल्या गोंयच्या खुबश्या वाठारांनी रस्त्याचेर मेळत थंय कोयर दिसता. कोयर वेवस्थापन पुरायेन हाल्लां. हे विशीं सगळ्यांत चड जतनाय दरेके पंचायतीन घेवप गरजेचें अशेंय तांणी स्पश्ट केलें. डिस्ट्रिक मिनरल फंडा वरवींय कोयर वेवस्थापना विशीं जायत्यो येवजण्यो आशिल्ल्यान ताचो लाव घेवपाचो उलो तांणी ह्या वेळार पंचायतींक मारलो.
ह्या वेळार सरपंच, अधिकार्‍यांक कोयर वेवस्थापनाचीं प्रात्यक्षिकां तशेंच येवजण्यांची अधिकार्‍यां वरवीं म्हायती दिली. ह्या वेळार पंचायत संचालक सिद्धी हळर्णकार, पराग रांगणेकार, गट विकास अधिकारी ओंकार मांजरेंकार आनी हेर हजर आशिल्ले.