भांगरभूंय | प्रतिनिधी
पणजी ः ‘उटा’ संघटनेचो द्विदशकपूर्ती सुवाळो आयतारा, 10 नोव्हेंबराक फर्मागुडीच्या अभियांत्रिकी महाविद्यालयाच्या मैदानार जातलो. ह्या वेळार राजकी आरक्षणा सयत णव म्हत्वाचे थाराव घेतले, अशें कला आनी संस्कृती मंत्री गोविंद गावडे हांणी सांगलें. मंगळारा पणजेत जाल्ले पत्रकार परिशदेंत ते उलयताले. ह्या वेळार संघटनेचे अध्यक्ष प्रकाश वेळीप आनी हेर पदाधिकारी हाजीर आशिल्ले.
आदिवासी समाजाच्या हक्कां खातीर लढपी ‘उटा’क 20 वर्सां पुराय जाल्ल्यान आमी हो सुवाळो व्हडलो करपाचो निर्णय घेतला. हे खातीर आदिवासी समाज संघटना सयत समाजाच्या पदाधिकाऱ्यांकूय आमंत्रण दितलें. दनपारां 3 वरांचेर कार्यावळ सुरू जातली. मुख्यमंत्री डॉ. प्रमोद सावंत आनी विरोधी पक्ष फुडारी युरी आलेमांव हे कार्यावळीक मुखेल सोयरे म्हूण हाजीर आसतले, अशें मंत्री गावडे हांणी सांगलें.
तांणी सांगलें, ह्या वर्सा सावन ‘आदिवासी हितचिंतक पुरस्कार’ दिवपाचें थारायलां. तो मनीस आदिवासी आसपाची गरज ना. आदिवासी समाजाक मजत करपी व्यक्तींचोय ह्या पुरस्कारा खातीर विचार करतले. उटा संघटनेंत फुडाऱ्यां परस कार्यकर्त्यांक चड म्हत्व आसा. देखून कोणूय आमकां सोडून गेलो जाल्यार संघटनेक कसलोच फरक पडना. आमी कोणा कडेन सर्त करीनात, देखून आमी सगळ्यांक आमंत्रण दिला.
कार्यावळींत राष्ट्रीय पांवड्यावेले आदिवासी फुडारी हाजीर आसतले. ह्या निमतान आक्रोश हो म्हायतीपट दाखयतले. तशेंच ‘उठा उजवाडाची वाट’ ह्या पुस्तकाचें प्रकाशन करतलें उटाचे अध्यक्ष प्रकाश वेळीप हांणी सांगलें.
मुंडा जयंती दिसा भौशीक सुटी जाहीर करात…
बिरसा मुंडा जयंती निमतान 15 नोव्हेंबराक राज्य सरकारान भौशीक सुटी जाहीर करची अशी आमी मागणी करतात अशें प्रकाश वेळीप हांणी सांगलें. हे संबंदीं आमी उटाच्या सुवाळ्यांत अधिकृत थाराव मांडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
