इंडोनेशियांत ज्वालामुखीचो उद्रेक : १० जाणांक मरण
भांगरभूंय | प्रतिनिधी
जकार्ता, खबरां संस्था: इंडोनेशियाच्या उदेंते कडल्या फ्लाॅरेस जुंव्यांवेल्या मावंट लिओटोबी लाकी-लाकी ज्वालामुखीच्या सोमारा जाल्ल्या उद्रेकांत १० जाणांक मरण आयलें, अशें अधिकार्यांनी सांगलें. आयतारा (३ नोव्हेंबर) सुमार २४ मिनटां ज्वालामुखीचो स्फोट जालो. उपरांत रातभर ताचे जायते फावट स्फोट जाताले. सकाळीं सुमार ६ वरांचेर गोबोर ३०० मिटर उंचायेर वतना दिसलो.
ज्वालामुखीच्या स्फोटाक लागून डझनभर भूंयकांपय जाले. सध्या इंडोनेशिया सरकारान आनीक स्फोट जावपाचो भंय उक्तायला. ज्वालामुखीच्या उद्रेकाक लागून ७ गांवांनी रावपी १० लोकांचो जीव गेला. ह्या वेळार जायतीं घरांय लासून गोबोर जालीं. लोकांनी सांगलें, उद्रेक आनी स्फोटा उपरांत उज्याचे गुळे घरांचेर पडटना दिसतालें. लोक घर सोडून धांवपाक लागले. प्रशासनान लोकांक ज्वालामुखीच्या ७ किलोमीटरच्या त्रिज्येपसून पयस रावपाचो सल्लो दिला.
५ गांव रिकामे केल्यात
माउंट लाकी-लाकी लागसारचे ५ गांव रिकामे केल्यात. तशेंच धुंवराचो प्रभाव चड आशिल्ल्यान लोकांक मास्क घालपाचो सल्लो दिला. ऑक्टोबर सावन मावंट लाकी-लाकीचो ४३ फावट उद्रेक जाला. फाटल्या सप्तकांत ज्वालामुखीचो धुंवर ८०० मिटरचे उंचायेर पाविल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
