भांगरभूंय | प्रतिनिधी
पणजी: दिवाळेचे सुटयेक लागून गोंयांतल्या दर्यादेगांचेर पर्यटकांची गर्दी वाडल्या. 31 ऑक्टोबर ते 3 नोव्हेंबर मजगतीं राज्यांतल्या विवीध दर्यादेगांचेर बुडपी 51 जाणांक वाटायले. हातूंतल्यो चडश्यो घडणुको कळंगूट, बागा दर्यादेगांचेर घडिल्ल्यो. तशेंच पाटणें दर्यादेगेर आत्महत्या करपी 17 वर्सा पिरायेच्या तरणाट्याक वाटावपाक लेगीत दृश्टी जिवरक्षकांक येस आयलें.
मेळिल्ले म्हायती प्रमाण पाटणें दर्यादेगेर 17 वर्सा पिरायेचो तरणाटो उदकांत भितर वतालो. कुटुंबान ताका दर्यादेगेर परतून आपोवपाचे खूबशे यत्न केले, तरिपूण ताणें ताका दाद दिली ना. ह्या वेळार जिवरक्षक नागराज गिरप आनी समीर काणकोणकार हांणी सर्फबोर्ड आनी जेटस्कीचे मजतीन ताका दर्यादेगेर हाडलो. माजोड्ड्यां अचकीत बोट उमथल्ल्यान वॉटर स्पोर्ट्स ऑपरेटर उदकांत पडलो. मयूर लहाने हाणें जेटस्कीचे मजतीन ताची सुटका केली.
बागांत पांच बायलांक जिवदान दिवपाक जिवरक्षक सौरभ कुमार, फोंडू गांवस, बुद्धाजी आनी साईनाथ गांवस हांकां येस आयलें. थंयच अहमदाबादांतले पांच इश्ट 30 मिटर उदकांत देंविल्ले. तांकां परतून दर्यादेगेर येवप कठीण जालें. जिवरक्षक सुशांत हाणें तांकां दर्यादेगेर हाडले. तशेंच कळंगूट दर्यादेगेर दोन तिट्टी बचावकार्याची नोंद जाली. जातूंत एक कर्नाटकांतल्या 20 ते 27 वर्सा पिराये गटांतल्या तीन व्यक्तीक जिवरक्षक नकूल उसापकार हाणें वाटायले.
कळंगूटे नोंद जाल्ले दुसरे घडणुकेंत जिवरक्षक विनोद सालेलकार, संजय यादव आनी उमेश मडकयकार हांणी महाराष्ट्रांतल्या सांगली हांगासरल्या तीन दादल्यांक वाटायले. तशेंच नागपूर आनी दिल्लींतल्या चार जाणांक जिवरक्षक नकूल उसापकार, सुनील माटोंकार आनी उमेश मडकयकार हांणी सर्फबोर्डाचे मजतीन वाटायले. तशेंच बागा आनी कळंगूट दर्यादेगांचेर जिवरक्षकांनी शेणिल्ल्या चार भुरग्यांक तांच्या पालकांचे सुवादीन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
