भांगरभूंय | प्रतिनिधी
मुख्यमंत्री: पीएम जिवन ज्योती, बिमा सुरक्षा ह्या दोन येवजण्यांचें लक्ष पुराय
पणजी: केंद्र सरकारान सुरू केल्ल्या पीएम जिवन ज्योती आनी बिमा सुरक्षा ह्या दोन येवजणयांचे लक्ष पुराय जाला. ह्यो येवजण्यो 18 वर्सां पिराये वयल्या 100 टक्के लोकां मेरेन पावोवपा खातीर 15 दीस विशेश मोहीम सुरू केल्ल्याचें मुख्यमंत्री डॉ. प्रमोद सावंत हांणी सांगलें.
सोमारा तांणी हे मोहिमेचो शुभारंभ केलो ह्या वेळार सांख्यिकी खात्याचे संचालक विजय सक्सेना आनी भारत सीएसआरचे डॉ. सादीक बी मानेस्त हाजीर आशिल्ले.
मुख्यमंत्र्यांनी म्हणलें, गोंयांत अपघाती मरणा मदीं वाड जायत आसा. तशेंच सैमीक मरणाक लागून लेगीत कुटुंबाचेर अर्थीक भार वाडटा. अशा वेळार ह्यो दोन येवजण्यो उपेगाच्यो थारत आसात. पीएम जिवन ज्योती हातूंत वर्साक फक्त 20 रुपया भरीत जाल्यार 2 लाख रुपया विमो मेळटा. तशेंच कायमस्वरुपी अपंगूळ येत जाल्यार एक लाख रुपया मेळटात. पीएम बिमा येवजणे खाला वर्साक 436 रुपया भरल्यार 2 लाख रुपयांचो विमो मेळटा. येवजण्यांचो लाव घेवपा खातीर बँकेंत वा पोस्टांत खातें आसप ही एकूच अट आसा.
तांणी मुखार म्हणलें, सद्या बाजारांत उपलब्ध आशिल्ल्या विम्याचो हप्तो वर्साक उण्यांत उणो 500 रुपया आसा. सर्व सामान्य मनशाक हें परवडचें ना. हाचो विचार करून प्रधानमंत्री नरेंद्र मोदी हांणी ह्यो येवजण्यो सुरू केल्यात. आमी राज्यांतल्या 18 वर्सां पिराये वेली दरेक व्यक्ती ह्या येवजण्यांचो लाव घेतली हे खातीर यत्न करतात. ह्या येवजण्यांक लागून व्यक्ती ताच्या मरणा उपरांतूय आपल्या कुटुंबांत मजत करूंक शकता. ताका लागून चडांत चड लोकांनी ह्या दोनूय येवजण्यांचो लाव घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
