भांगरभूंय | प्रतिनिधी
अर्ज छाननी वेळार बोवाळः जिल्हो निबंधका कडल्यान वेंचणूक प्रक्रिया ‘जैसे थे’
भांगरभूंय । प्रतिनिधी
पणजीः फाटल्या कांय वर्सां सावन भंडारी समाजांतल्या दोन गटां मदीं चालू आशिल्लो वाद सोमारा तेंगशेर पावलो. भंडारी समाजाचे वेंचणुके खातीर आयिल्ल्या अर्जांची छाननी करून वेंचणूक अधिकाऱ्यांनी विरोधी गटाचे फक्त पांच अर्ज ग्राह्य धरून हेर भायर मारले आनी देवानंद नायक हांच्या पॅनलाक जैतवंत घोशीत केलें. त्याच वेळार जिल्हो निबंधकान ही वेंचणूक प्रक्रिया ‘जैसे थे’ दवरून 7 नोव्हेंबराक सुनावणी घेवपाचें जाहीर केलें. ते उपरांत दोनूय गटां मदीं केस्तांवां जालीं.
गोंयांतल्या सगळ्यांत व्हड भंडारी समाजांत कांय वर्सां आदीं उबी फूट पडली. समाजांत तयार जाल्ले दोन साबार बसके वरी विवीध विशया वयल्यान एकामेका आड उबे रावले. तांचे मदलो वाद खूब खेपे उच्च न्यायालयांत लेगीत पाविल्लो. ते खातीर भंडारी समाजाची वेंचणूक ही खुबूच चुरशीची जातली हें निश्चीत आशिल्लें. वेंचणुके खातीर दाखल जाल्ल्या अर्जांची सोमासा सकाळीं पाटो पणजेच्या भंडारी समाजाच्या कार्यालयांत छाननी प्रक्रिया सुरू जाली. त्याच वेलार विरोधी गटाचे उमेदवार आनी पदाधिकारी कार्यालया भायर जमले. वेंचणूक अधिकाऱ्यांनी विवीध कारणां दिवन, विरोधी उमेदवारांचे अर्ज भायर मारपाक सुरवात केले उपरांत कार्यालया भायर विरोधी गटाच्या पदाधिकाऱ्यांनी बोवाळ मारपाक सुरवात केली. परिस्थिती नियंत्रणा भायर वचपाची शक्यताय आशिल्ल्यान पुलिसांनी भंडारी समाजाच्या कार्यालयाक संरक्षण दिलें. तरी लेगीत कांय वेळ थंयचें वातावरण तणावा खाला आशिल्लें.
मजगतीं, वेंचणूक अधिकाऱ्यांनी देवानंद नायक हांच्या पॅनलाच्या बारा उमेदवारांचे अर्ज ग्राह्य धरले. जाल्यार विरोधी उपेंद्र गांवकार पॅनलाच्या फक्त पांच उमेदवारांचे अर्ज ग्राह्य धरून हेरांचे अर्ज विवीध कारणां वयल्यान रद्द केले आनी देवानंद नायक हांच्या पॅनलाक जैतवंत म्हूण घोशीत केलें. ते उपरांत देवानंद नायक हांचे अध्यक्षते खाला 17 जाणांची नवी समिती स्थापन जाल्ल्याचें स्वता नायक हांणी जाहीर केलें.
उच्च न्यायालयाच्या निर्देशा प्रमाण जिल्हो निबंधकांनी फाटले खेपे घेतिल्ले सुनावणे उपरांत जारी केल्लो कारणां दाखयात नोटिसो आपल्याक मेळूंक ना, असो दावो करून देवानंद नायक हांणी 1 नोव्हेंबराक उच्च न्यायालयांत धांव घेवन, सुनावण्यो हेर जिल्हो निबंधका वरवीं जावच्यो, अशी मागणी केल्ली. पूण देवानंद नायक हांकां जिल्हो निबंधकांनी 29 ऑक्टोबराक नोटीस जारी केल्ली, अशी म्हायती उपेंद्र गांवकार गटाच्या अॅड. आतिश मांद्रेंकार हांणी दिली.
दुसरे वटेन 1 नोव्हेंबराक देवानंद नायक हांणी उच्च न्यायालया मुखार सादर केल्ल्या प्रतिज्ञापत्रांत स्वताचो उल्लेख अध्यक्ष म्हूण केला. वेंचणूक जावचे आदींच देवानंद नायक समाजाचे अध्यक्ष कशे जाले, असो प्रस्न मांद्रेंकार हांणी उपस्थीत केलो. हे विशीं उच्च न्यायालयांत मंगळारा जावपी सुनावणे वेळार आमी हो मुद्दो उपस्थीत करतले, अशेंय तांणी स्पश्ट केलें.
जिल्हो निबंधकांनी वेंचणूक प्रक्रिया ‘जैसे थे’ दवरल्या. उच्च न्यायालयांत हे विशींच्यो सुनावण्यो चालू आसात. ताका लागून देवानंद नायक हांणी जाहीर केल्ली नवी समिती कायदेशीर जावपाक शकना, अशेंय मांद्रेंकार हांणी सांगलें.
‘नवी समिती आयच्यान काम करतली सुरू’
भांडारी समाजांत व्हड फूट पडल्या. पूण आतां वेंचणूक जाल्ल्यान मतभेद विसरून सगळ्यांनी एकठांय येवन समाजा खातीर काम करप म्हत्वाचें आसा. सरकाराच्या आदारान समाजाची सर्वांगी उदरगत करतले, अशें देवानंद नायक हांणी सांगलें. वेंचणूक प्रक्रिया जैसे थे दवरपाच्या जिल्हो निबंधकाच्या आदेशा विशीं विचारलें तेन्ना तांणी सांगलें, जिल्हो निबंधकाचो आदेश अजून आपल्याक मेळूंक नाक. वेंचणूक अधिकाऱ्यांनी आदेश जारी केला. ते प्रमाण नवी समिती मंगळारच्यान काम सुरू करतली, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
