भांगरभूंय | प्रतिनिधी
नोंदणी फी, स्टॅम्प ड्युटींतल्यान आठ पटीन महसूल वाडपाचो अदमास
भांगरभूंय । प्रतिनिधी
पणजीः फाटल्या दोन म्हयन्यांत पेडणें, बार्देस, तिसवाडी, मुरगांव आनी साश्ट ह्या पांच म्हालांतल्या जमनींचे दर व्हड प्रमाणार वाडयिल्ल्यान अंदूंच्या अर्थीक वर्सांत सरकाराक नोंदणी फी आनी स्टॅम्प ड्युटीच्या माध्यमांतल्यान सुमार 1,800 कोटींचो महसूल मेळपाक शकता, असो अदमास सरकारी सुत्रांनी सोमारा ‘भांगरभूंय’ कडेन उलयतना उक्तायलो.
फाटल्या कांय वर्सां सावन गोंयांतल्या जमनींची व्हड प्रमाणांत विक्री जाता. खूबशे बिगर गोंयकार फुडाराचो विचार करून गोंयांतल्या दर्यादेग वाठारांतल्यो जमनी विकत घेवपाचेर भर दितात. ताका लागून पेडणें, बार्देस, तिसवाडी, मुरगांव आनी सास्ट ह्या पांच म्हालांनी जमीन विक्रींत वाड जाल्ल्याचें दिसून येता. हाचो फायदो सरकारी तिजोरेक करून घेवचे खातीर सरकारान ह्या पांचूय म्हालांतल्या जमनींच्या मूळ दरांत स पटींनी वाड केल्या. ताका लागून हे मुखार ह्या वाठारांतल्या जमीन विक्रींतल्यान नोंदणी फी आनी स्टॅम्प ड्युटीच्या माध्यमांतल्यान सरकाराक आदले तुळेंत आठ पट महसूल मेळटलो, अशें सुत्रांनी सांगलें.
सध्या नोंदणी फी आनी स्टॅम्प ड्युटी रकमेचेर घेतात. जमनीच्या मोलाचेर नोंदणी फी आनी स्टॅम्प ड्युटी मेळून 7 ते 7.50 टक्के रकम जमीन विकत घेवप्याक सरकाराक दिवचे पडटा. आतां जमनीचें मूळ मोल वाडयल्ल्यान नोंदणी फी आनी स्टॅम्प ड्युटीची रकम लेगीत वाडटली, अशें सुत्रांनी स्पश्ट केलें.
अंदूं 900 कोटींची आशिल्ली मोख
अंदूंच्या अर्थीक वर्सांत नोंदणी फी आनी स्टॅम्प ड्युटीच्या माध्यमांतल्यान सरकारान सुमार 900 कोटींची मोख दवरिल्ली. तातूंतली सुमार 60 टक्के रकम सरकारी तिजोरेंत जमा जाल्या. पूण दर वाडिल्ल्यान अंदूं हो महसूल सुमार 1,800 कोटी मेरेन वचपाची शक्यताय आसा, अशें सुत्रांनी म्हणलां.
जमनींचें दर वाडयल्ल्याची अधिसुचोवणी जारी जावचे आदीं जांणी पेडणें, बार्देस, तिसवाडी, मुरगांव आनी साश्ट ह्या वाठारांत जमनी खरेदी करून तांची नोंदणी केल्या, अश्यांक आदल्याच दरा प्रमाण नोंदणी फी आनी स्टॅम्प ड्युटी दिवची पडटली. अधिसुचोवणे उपरांतच्या वेव्हारांचेर मात नव्या दरां प्रमाण फी घेतले, अशें सुत्रांनी म्हणलां.
गिमांत वाडटा सेलडीड
ज्या पांच म्हालांनी जमनींचे दर सरकारान वाडयल्यात, थंयच्यो जमनी खरेदी केले उपरांत हे आदीं नोंदणी प्रक्रियेंत टाळाटाळ जाताली. पूण सप्टेंबरांत पेडणें आनी बार्देसांतले दर वाडयले उपरांत ही प्रक्रिया गतीन जातात, अशें दिसून आयलां. जानेवारी ते एप्रील ह्या चार म्हयन्यांच्या कालांत गोंयांतल्या सेलडीडांत वाड जाता. तेच खातीर हेर तीन म्हालांतल्या जमनींचे दर लेगीत वाडोवपाचो निर्णय सरकारान घेतला, अशेंय सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
