भांगरभूंय | प्रतिनिधी
म्हापशें, प्रतिनिधी ः नागवें रस्त्यार दवरिल्ल्या वीज केबलाच्या रिळाक लागून अपघात जाताले. हाका लागून थळाव्यांनी तिडक उक्तायिल्ली. निमाणे तें वीज केबलाचे रीळ थंयच्यान काडून सुरक्षीत सुवातेर व्हरुन दवरलें.
हडफडे- नागवें पंचायत वाठारांत जमनीपोंदा वीज केबल घालपाचें काम फाटल्या कांय म्हयन्या सावन चालू आसा. ह्या प्रकल्पा खातीर नागवें उपकेंद्र आनी ड्रीम सर्कल हांचे मदीं केबल घालपा खातीर केंद्रा मुखार रस्त्याक तेंकून केबलाचें रीळ दवरिल्ले. तें यो-वच करपी गाडयांक आडखळ हाडटालें.
शेनवारा 2 तारखेर सकाळीं एके मोटारीन ह्या रिळाक धपको दिल्लो. अपघातांत कोणाक कांय जावंक नाशिल्ले. पूण मोटारीचे व्हड लुकसाण जालें. उपरांत उत्तर गोंय रस्तो सुरक्षा समितीचे वांगडी सावियो त्रावासोन नाराजी उक्तायिल्ली. वीज खाते आनी कंत्राटदारान धोक्याचे अवस्थेंत रस्त्यार दवरिल्लें रीळ बेगोबेग काडपाची मागणीय तांणी केल्ली.
ते भायर हडफडें- नागवेंचे सरपंच रोशन रेडकार हांणी वीज अधिकाऱ्यां कडेन संपर्क सादून तें रीळ थळा वयल्यान काडपाची सुचोवणी केल्ली. मजगतीं, सोमारा कंत्राटदारान तें रीळ कुशीक व्हरून दवरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
