भांगरभूंय | प्रतिनिधी
वास्को ः वास्को रेल्वे पुलीस स्टेशनाक जोडिल्ल्या 22 वर्सां पिरायेच्या पुलीस कॉन्स्टेबलान शुक्रारा 25 ऑक्टोबराक पुला वयल्यान न्हंयेंत उडी मारून आत्महत्या केली. हे विशीं गुन्यांव फांट्यान गुन्यांव नोंद केले उपरांत वास्को पुलिसांनी चवकशी करपाक नेट धरलो. मेळिल्ले म्हायती प्रमाण, प्रथमेश गावडे हाका मानसीक त्रास दिवन आत्महत्या करपाक प्रेरीत केल्ल्याच्यो आरोप दवरून दोगां बायलां पुलीस कॉन्स्टेबलांक काल ताब्यांत घेतल्यांत.
आत्महत्या करचे पयलीं ताणें व्हिडियो रेकॉर्ड करून दोन बायलां पुलीस कॉन्स्टेबल आनी तांच्या भावान दिल्ल्या मानसीक त्रासाक बेजारुन आत्महत्या केल्ल्याची म्हायती दिल्ली. हो व्हिडियो सोशल मिडियाचेर व्हायरल जाल्लो. आत्महत्या करचे पयलीं प्रथमेशान भलायकी बरी ना अशें सांगून दोन दिसांची सुटी घेतिल्ली. पूण शुक्रारा सांजवेळार तो घरा वचनासतना सांजवेळा 6 वरांचेर कुठ्ठाळें आयलो आनी आत्महत्या केली.
प्रथमेश हाचे आगशी पुलीस स्टेशनांतल्या बायल पुलीस कॉन्स्टेबला कडेन मोगाचे संबंद आशिल्ले. तांकां लग्न करपाची इत्सा आशिल्ली. पूण दोगांयच्या कुटुंबांचो ताका विरोध आशिल्लो.
मजगतीं, उजो पालोवपी दळाक म्हायती मेळ्ळें उपरांत ते रोखडेंच थंय पावले आनी दर्यादेगेवेले पुलीस आनी पुलीसांच्या मजतीन सोद कारवाय सुरू केली. मुरगांव एमपीटी कडेन जुवारी न्हंयेंत प्रथमेशाची कूड मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
