भांगरभूंय | प्रतिनिधी
फोंडें, प्रतिनिधी: फर्मागुडीयेर आयआयटींत शिक्षण घेवपी जिव्या विजयकुमार खती (१९, मध्यप्रदेश) हे विद्यार्थीनीन गर्ल्स हॉस्टेलांतले कुडींत गोळ घेवन आत्महत्या केली. हो आत्महत्येचो प्रकार शेनवारा उक्ताडार आयलो. पुलिसांनी घडणुकेचो पंचनामो केला. आजून आत्महत्येचें कारण समजूंक ना.
हे विशीं चड म्हायती प्रमाण, दुसर्या वर्साच्या वर्गांत शिक्षण घेवपी जिव्यान गोळ लावन आत्महत्त्या केली. शेनवारा सांजेवेळार गर्ल्स हॉस्टेलांत रावपी विद्यार्थीनीचे कुडीचें दार बंद आशिल्ल्यान हेर विद्यार्थ्यांनी दार मोडून भितर प्रवेश केलो. तेन्ना जिव्या गोळ घेतिल्ले अवस्थेंत दिसली. विद्यार्थ्यांनी तिका रोखडीच फोंडेंच्या खाजगी हॉस्पिटलांत उपचारा खातीर व्हेली. मात दोतोरांनी तिका मरण आयिल्ल्याचें सांगलें.
हे विशीं फोंडें पुलिसांक म्हायती दिली. पुलिसांनी कुडीची तपासणी केली तेन्ना, ‘ताणाक लागून आत्महत्त्या करता’ अशें बरोवन दवरिल्लें पत्र पुलिसांच्या हाताक लागलें. मरण आयिल्ले विद्यार्थीनीच्या पालकांक हे विशीं म्हायती दिल्या. तीं गोंयांत आयले उपरांत विद्यार्थीनीचे कुडीचें पोस्टमार्टम जातलें. निरीक्षक विजयनाथ कवळेंकार हे विशीं फुडें तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
