भांगरभूंय | प्रतिनिधी
अंदूंचो सुवाळो भव्य प्रमाणांत करपाचो सरकाराचो निर्णय
पणजी, प्रतिनिधी : पोरणें गोंयचे सेंट फ्रान्सीस झेवीयर अवशेश दर्शन सुवाळ्याचीं सगळीं कामां १५ नोव्हेंबर मेरेन पुराय जातलीं. आतां मेरेन ९० टक्के कामां पुराय जाल्यांत, अशी म्हायती मुख्यमंत्री डॉ. प्रमोद सावंत हांणी दिली. तयारेचो नियाळ घेवपा खातीर डॉ. सावंत हांच्या फुडारपणा खाला बसका जाली. बसकेक पर्यावरण मंत्री आलेक्स सिक्वेरा हाजीर आशिल्ले.
अंदूचो सुवाळो भव्य स्वरूपाचो जातलो. येरादारी खातीर कदंबा बशींची वेवस्था आसतली. रस्ते हॉटमिक्स करपाचीं कामां आनीक ८ दिसांनी पुराय जातलीं. सगळ्या कामांची गती समाधानकारक आसा, अशीय म्हायती तांणी दिली.
उत्तर गोंय जिल्लोधिकारी तशेंच येरादारी पुलीस अधीक्षक पार्कींग तशेंच येरादारी वेवस्थेचो नियाळ घेत आसात. चर्च वाठारांत २ हजार गाडयां खातीर पार्कींगाची वेवस्था आसतली. हे भायर २०० जाणांक व्हीआयपी पास दितले.
फ्रान्सीस झेवीयर अवशेश दर्शन सुवाळो २१ नोव्हेंबर ते ५ जानेवारी मजगतीं जातलो. तो धा वर्सांतल्यान एकदां जाता. दर दिसा हजारांनी भावीक भेट दितात. चर्च वाठारांत फुटपाथा सयत जमनी पोंदच्यान विजेच्यो सरयो घालपाचीं कामां पुराय जाल्यांत. शवप्रदर्शन काळांत सेगीत वीज पुरवण जावपा खातीर २०० एमव्हीए ट्रान्सफॉर्मराचें उक्तावण जालें.
भाविकां खातीर पियेवपाच्या उदकाची वेवस्था आसतली. ज्येश्ट नागरिकां खातीर वेगळी वेवस्था आसतली. चर्चीच्या पेंटींगाचें काम पुराय जालां. अवशेश दर्शन सुवाळ्यांत कायदो सुवेवस्था राखप ही मुखेल जापसालदारी आसतली. कायदो सुवेवस्था राखपा खातीर सीसीटीव्ही कॅमेरे बसयतले. सीसीटीव्ही कॅमेरे खंय आनी कशे बसोवपाचे हाचेर पुलिसांचो विचार सुरू आसा, अशें आयोजन समितीच्या वांगड्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
